Ai pitchi d'mé, oh Dgieu, ai pitchi d'mé! Ch'est en tchi j'm'abrie en té. J'm'abriéthai à l'ombre dé tes ailes jusqu'à ch'qué les malheurs saient pâssés. J'crie au Bein Haut Dgieu, au Dgieu tchi fait tout pouor mé. Il envyie du ciel et m'sauve, lichonnant les cheins tchi sont âpres à m'pourchasser. Lé Bouôn Dgieu envyie s'n amour et sa fidélité. Mén âme est parmi les lions; j'sis oblyigi dé d'meuther au mitan d'bêtes affanmées, au mitan d'hoummes dé tchi les dents sont des lances et d's èrchelles, dé tchi la langue est un sâbre aîdgu. Sai louangi, Oh Dgieu, au-d'ssus des cieux, qu'ta glouaithe sait sus toute la tèrre! Il' avaient grée un drannet à mes pids, mén âme sé baîssait dêjà; il' avaient creusé eune fôsse l'avant à mé - ieux, il' ont tchée d'dans. Man tchoeu tcheint bouôn, oh Dgieu, man tchoeu tcheint bouôn. Jé chant'tai et f'thai d'la musique. Rêvil'ye-té, m'n âme! Rêvil'-ous ma hèrpe et ma lythe! J'rêvil'lai l'assinne. Jé t'louang'geai parmi les peupl'yes, seigneu! Jé t'chant'tai parmi les nâtions, Ch'est en tchi t'n amour est grand et aveint jusqu'ès cieux, et ta fidélité jusqu'ès nues. Sai louangi, oh Dgieu, au-d'ssus des cieux; qu'ta glouaithe sait sus toute la tèrre!
Viyiz étout: