Rends-mé justice, Seigneu! Car j'ai m'né eune vie sans faute; jé m'sis fié au Seigneu, et j'n'ai pon 'té châtchi. Êprouve-mé, Seigneu, et teste-mé, examinne man tchoeu et m'n esprit, ch'est en tchi j'ai tréjous gardé dans m'n esprit t'n amour tchi duthe et j'ai vêtchu en m'fiant à ta fidélité. Jé n'm'assieds pon auve les embliûtreurs, jé n'm'assôcyie pon auve les hypocrites. J'déteste l'assembliée des malfaiteurs et r'fûse dé m'assiéthe auve les malîns. Jé m'lave les mains dans l'înnouothanche, et j'vais l'tou dé t'n auté, Seigneu, en provliâmant à haute vouaix touos tes mangnifiques faits.
Seigneu, j'aime la maîson où'est qu'tu d'meuthe, lé lieu où'est qu'ta glouaithe habite. N'enlève pon m'n âme acanté les pécheurs, ma vie acanté l's hoummes dé sang, dé tchi les mains sont crînminnelles, et les mains dêtres graîssies d'corruption. Mé, j'ai m'né eune vie sans faute; d'livre-mé et ai pitchi d'mé! Man pid est fèrme sus l'pliat d'la tèrre; dans la grande assemblié j'bénithai l'Seigneu.
Viyiz étout: