Lé rouai s'rêjouit en ta forche, Seigneu. Combein grand qu'est sa jouaie dans les victouaithes qué tu bâle! Tu li'as bailli chein qu'san tchoeu d'sithait et n'as pon r'fûsé chein qu'ses lèvres démandaient. Tu'es v'nu l'atchilyi auve des riches bénédictions et as pliaichi eune couronne en or pur sus sa tête. I' t'a d'mandé pouor la vie et tu l'i'as bailli - à londgeu d'jours, à tout janmais. Par les victouaithes qué tu'as bailli, sa glouaithe est grande; tu li'as fait un don d'mangnificence et d'majesté. Tu li'as bailli, véthe, des bénédictions sans cêsse et l'as fait rêjoui dans la jouaie d'ta présence. Ch'est en tchi l'rouai s'fyie au Seigneu; par l'amour du Pus Haut i' n'sa pon châtchi. Ta main gaff'tha touos tes enn'mîns; ta main dêtre empouongn'na les cheins tchi t'détestent. Quand tu'appathais pouor la batâle, tu les brûl'las coumme dans un fou à fliambes. Lé Seigneu l's engaûm'tha dans sa mârrisson et san feu les brûl'la. Tu dêtruithas lus d'cendants d'la tèrre, lus postéthité d'l'humannité. Ouaithe qu'i' conspithent malinnement contre té et înmaginnent des mauvais plians, i' n'peuvent pon rêussi. Tu les f'thas touônner l'dos quand tu tith'thas sus ieux atout tén ar bandé. Lève-té dans ta forche, Seigneu; jé chant'tons et louang'geons tan pouvé.
Viyiz étout: