Chantez au Seigneu eune nouvelle chanson; chantez au seigneu, tout l'monde. chantez au seigneu, louangiz san nom; procliâmez san salut dé jour en jour! Dêcliathez sa glouaithe parmi les nâtions, ses mangnifiques faits parmi touos les peupl'yes. Ch'est en tchi l'Seigneu est grand et méthite hardi d'louanges; nou dait l'craindre pus qu'touos les dgieux. Ch'est en tchi les dgieux des nâtions sont d's idoles, mais l'Seigneu griyit les cieux. La mangnificence et la majesté sont l'avant à li; la forche et la glouaithe sont dans san sanctuaithe. Rendez au Seigneu, fanmil'yes dé peupl'yes, rendez au Seigneu la glouaithe et la forche. Rendez au Seigneu la glouaithe deue à san nom; apportez des présents et entrez dans ses bels. Louangiz l'seigneu dans la mangnificence dé sa sainteté; trembliez l'avant à li, toute la tèrre. Dites parmi les nâtions, "Lé Seigneu règne." Lé monde est fèrmément êtablyi. Nou n'peut pon l'èrmuer; i' jug'gea les peupl'yes auve la justice. Qu'les cieux lus rêjouissent, qu'la tèrre sait heutheûthe; qu'la mé et tout chein qu'ou contcheint faiche du brit. Qu'les clios et tout chein qu'i' contcheinnent saient rêjouis; qu'touos les bouais d'la bouaîs'sie chantent auve d'la jouaie. Qué toute la criâtion s'rêjouisse l'avant au Seigneu, par cause qu'i' veint, i' veint pouor jugi la tèrre. I' jug'gea l'monde en justice et les peupl'yes dans sa fidélité.
Viyiz étout: