Mén âme bénis l'Êtèrnel, et qué tout ch' tch'est en mé bénisse san Saint Nom.

Mén âme, bénis l'Êtèrnel, et n'oublyie pon autcheune dé ses bouôntés.

Ch'est Li tchi pardonne touos tes péchés, et tchi dgéthit touos tes maux;

Tchi prêsèrve ta vie d'la fôsse, et t'couronne dé bénédictions et d'compâssion;

Tchi rempl'ye ta bouoche dé bouonnes choses, tellement qué ta jannèche est èrnouvelée comme la cheinne d'eune aigl'ye.

L'Êtèrnel fait justice et donne lé drouait à touos l's afflyigis.

Il a fait à saver sa volanté à Moïse, et ses actions ès êfants d'Israël.

L'Êtèrnel est remplyi d'bouônté, et dé douocheu, il a hardi d'amour, et eune grand' pâcienche.

I' n'atchus'sa pas tréjous, ni n'gardétha pon sa coléthe à janmais.

I' né nouos a pon punnis s'lon nouos péchés, et I' né nouos a pon rêcompensés pouor autant.

Car, comme lé ciel est êlevé au-d'ssus d'la tèrre, autant sa mînséthicorde est grande envèrs les cheîns tchi l'craingnent.

Il a êlouongni d'nous nouos péchés, à eune distance aussi grande qué l'Êst est du Ouêst.

Comme un péthe a compâssion à l'égard dé ses êfants, l'Êtèrnel mouontre sa compâssion ès cheins tchi l'craingnent.

Car I' sait bein dé tch'est qué j'sommes faits; I' s'rappelle qué jé n'sommes qué poussiéthe.

Les jours dé l'homme mortel sont comme l'hèrbe; i' flieuthit comme la flieur du clios;

Car lé vent pâsse par-dessus, et la v'là horte, et sa pliaiche né la r'connait pus.

Mais la mînséthicorde dé l'Êtèrnel duthe pouor tréjous, et à tout temps pouor les cheins tchi l'craingnent, et sa justice dé généthâtion en généthâtion:

Pouor les cheins tchi gardent s'n alliance, et tchi s'èrsouveinnent dé ses c'mandements pouor les siéthe.

L'Êtèrnel a êtablyi san trône dans l'Ciel: et san règne a dominnâtion par-dessus tout.

Bénissiz l'Êtèrnel, vous ses Anges, remplyis d'forche, faithant san c'mandement en obéissant à la vouaix d'sa pathole.

Bénissiz l'Êtèrnel, vous toutes ses armées, vous ses minnistres tchi faites sa volanté.

Bénissiz l'Êtèrnel, vous ses oeuvres dans toutes les pliaiches dé s'n Empire. Mén âme, bénis l'Êtèrnel.

Mén âme benit l'Êternel et n'oublyie pas autcheune dé ses bontés

La bonté dé l'Êternel duthe tréjous