Les Pages Jèrriaises

Lé pangni pèrchi pâle dé l'as dé tchoeu

Lé pangni pèrchi pâle dé l'as dé tchoeu;
la garcette embliût'rêsse pèrd l'cotillon;
lé pâté d'poummes est mangie par l'bâfreux
(ou savez qu'chu pâté 'tait d'ma faichon).
La rouanne galope par les clios à Saint Pièrre;
lé pangni pèrchi a l'filet copé;
nou n'craithait janmais ni l's ouothelles ni l's ièrs;
la r'connaîssance tape atout un mallet.
Lé fèrmage dé tchoeurs, cotillons, pâtchieaux,
et brits tchi couothent embliûtrétha l'chèrvé
enfaûtomé d'la galop'thie dé j'vaux.
Les tchoeurs et poummes sont fouangnés dans l'pâté
à Saint Pièrre. La rouanne galope par les clios
pus quédaine qué d'l'êcliandre avaû l'dalot.

Geraint Jennings

 

(Chutte poésie fut composée en faîthant sèrvi eune pouongnie d'mots chouaîsis à Dgi l'adèrt dé d'dans l'dictionnaithe)

 

Viyiz étout:

 

Les Pages Jèrriaises