Oh! né v'là coumment qu'ch'est
Qu'ou faites des compliments:
J'vé bein qu'la r'counnaissance,
Pas pus qu'les r'mèrcîments,
Né fait
L'Objet
D'une seule pétite ermèrque,
Dans chutte longue alibie
Là oùest qu'ou nos prêchis:
M'n'almanâ fait sa mèrque!

Oh! né v'là coumment qu'ch'est
Moussieu, qu'ou z'apprécièz
Chein qu'nou peut faithe pour vous!
Ch'est même qu'ou nos r'merciez
Dites mé
Dé vrai,
S'nou peut être bein joyeux,
Quand nou z'a travaill'yi
(Rein qu'pour vos faithe pliaisi),
Et qu'nou ouait l'mot: "Pliercheux!"

Oh! né v'là coumment qu'ch'est
Qu'ou rchevèz nos êfforts:
Une mine de cat rôti
Unn' fache de crapaud mort!
J'voudrais
Vos vaie
D'tchic bord, une bouanne séthée
Quand jé s'saimes qué nouos deux
Touos seurs - entre-quatre-z-ièrs
J'vos don'nais des! "Plièrcheux!"

Oh! né v'là coumment qu'ch'est
Qu'ou savez dithe: Merci!
Es gens qui vos êcrivent
En prose ou poêsie:
Ils ont
D's'affronts
Cliuttès au nez d'la sorte!
Tch'est don qui vos faudrait?
Ah! s'ou v'nèz par sièz nous
Ch'est mé qui vos r'chèv'thai!

Oh! né v'là coumment qu'ch'est
Qu'ou traitez l'pouorre rimeux
Ou vos pliaigniz qui s'landre
Et qui n'est qu'un Plièrcheux
Qui n'vaut
Pon gros!
Mais j'vos d'mande à man tou,
Tchi môque est qui vos pique?
Qu'ou séyiz si critique
Coumme chonna, tout d'un coup?

Oh! né v'là coumment qu'ch'est
Qu'ou vos motrèz l'ammin
Des cheins tchi vos soulagent
Et cherchent à vos souôtnin:
"Plièrcheux
D'rimeux!"
N'en v'là d'z'êcalifias!
Des "Mercis" à la hache!
Des talmouses dans la fache!
Un mûsé coumme le bras!

Oh! né v'là coumment qu'ch'est
Qu'ou voulez être servis!
S'nou n'vos dounne pon un tas:
"En avant les coups d'pi!"
I vos
En faut
Par la verge des rimes!
M'est avis qu'pour vos pliaithe
Et gangni votre estime
L'impossibl'ye i faut faithe.

Oh! né v'là coumment qu'ch'est
Ou criyiz qu'nou z'arrange
Des vers pus aisîment,
Qu'des soubats dans une grange!
Mais vous
Dites nous,
Pourth'est qu'ou n'en faites pon!
Ch'est bein ou moins poirtant!
Allons-y! Rimèz-don!
Vous qui nos bliaumez tant!

Oh! né v'là coumment qu'ch'est
Qu'ou vos en dêhallez:
"Ou n'savez pas rîmer?"
Faites coumme nous: Eprouvez!
Une fais,
Vingt fais,
R'rêcrivèz vot' versèt,
Pour l'aver coumme i faut
"- Ou n'trouvez pas les mots? -"
Oh! Ch'est d'la Plièrcheusetè!

Allons don, capuchiz!
Rimez jusqu'à min'nièt
Ou une heuthe du matin,
Quant tout l'monde est au lièt.
Cherchis,
Fouoillis,
Vot, pouorre chervé lassè
"Les rimes né vos veinnent pas?"
Ou mettez vot pl'yumme bas!
Oh! Ch'est d'la Plièrcheusetè!

Oh! né v'là coumment qu'ch'est
"Ou n'pouvez pon achteu?
Ou vos y r'mettez d'main,
Erposè, d'miyeu tcheu?"...
- Parmi
Tout l'bri
D'z'avers qui braillent et grignent,
Faizous fort mus qué d'vant?
Qué tchi? Pas même deux lignes
Qui finissent sus l'même sens?

Oh! né v'là coumment qu'ch'est
Qu'ou z'entendez rimer?
C'h'est fichi encre et pl'yumme
Raidde contre la pathè.
Achteu,
Moussieu,
Si trente vers mé donnent droet
Au soubriquet d'Plièrcheux,
T'chi dithe quand vous, ma fé!
N'en faites pon se'lment deux?

J'ai l'honneur et pas honte
Dé m'souscrithe