Les Pages Jèrriaises

Deux mots

Adréchis spécialement ès auteurs Jerriais

Né v'là l'êté dêjà fini
Et l'mais d'Octobre qu'est q'menchi
En tourbillons de d'sus les boies
Achteu nou vé toutes les fielles tchaie.

Y'a longtemps q'les fains sont rentrés,
Dans les hôgards les tas sont faits.
Noué s'en va nos surprendre tous
Comme lé temps va mon doux! mon doux!

En pâlant d'noué v'là qui m'rappelle
Qué l's'Editeurs de la "Nouvelle"
S'en vont avé tchic embarras:
'Il est temps d'faithe lus Almanâ'.

Tch'est q'j'y trouvthons, jé n'sé, ch't'année?
Des anecdotes bein racontées,
Deux-treis d'vinâles par ichin par là,
Des historiettes et tout chonna.

Avec tout ch'la s'sait-i compliet?
Ah! mais nennin, i n'est parfait
Et suivant l'goût des vrais Jerriais
Qué quand il a tchic mots d'patoiès.

Allons! vite, collaborateurs
Faut bein aidji ès Editeurs
Si n'peuvent pas l'faithe, faut q'jé faichons
Vite, don m's'amins, pliume ou crayon.

Ch'la S'Peut, qui n'oublie pon l'Jerriais
Quoéq'tu n'ouée pâler qué l'Angliais
Tu nos en donne souvent d'biaux bus
Et bein s'i-t'p'yais - vite, fais d'tan mus.

Et té, man Bram, puorre vier amin -
Oublie la minzèthe et l'chagrin,
Rajeunis té en nos contant
Tchic drôle d'histoèthe de tan janne temps.

Et J.D.R. - t'en vas tu v'nin
Nos raconter tchic mio d'gnolin
Tu peux bein l'faithe si tu'as idée
N'oublie pon l'Almanâ ch't'année.

Y'en a bein d'autres qui peuvent aidji
- Allons m's'ammins, faut s'rêvill'yi
Chatchun san but, en vers, en prose,
Et mé d'ma carre, j'dithai tchic chose.

Mais n'faut pas êcrithe trop d'gnolin,
Tout pyein d'buon fun mais pas d'bavin
Qué châtchun d'nous essait poli
Et prenje buon soin d'chein qu'il êcrit.

Pas un seul mot qui pathaisse laid.
Qué chaque passage essait parfait.
Qui n'yait rein qui gâte not' travas
Quand même ch'n'essait q'sus l'Almanâ.

Faut don s'y mettre; - et tous d'buon tcheu.
Qué châtchun donne dé san miyeu
Allons m's'amins j'avons d'tchi faithe
Pâlons l'Jerriais, n'faut pas nos taithe.

En viers Jerriais prouvons à tous
Qué not' langage sé pâle tréjous.
- Eche qué ch't'année jé n'puorrons pas
BATTRE LÉ R'CORD des Almanâs?

A la précheine,
Elie
16/10/1901

 

Viyiz étout:

 

Les Pages Jèrriaises