I' faîthait bé, lé lithait et j'tais sus ma bike. J'pédalis par la côte et pis j'montis un mio et en m'dêhalant d'sus la grande route, j'touônnis dans un p'tit c'mîn non-tathé, En entrant dans lé c'mIn j'montis un p'tit but raide entre les fôssés et y'avait des banques où'est qu'i' y'avait des potithons coule d'lîlas. Ch'tait d'charme. Auprès les potithons y'avait un mio pus d'laîze entre les banques et à s'nêtre y'avait eune bouonne veue sus la vallée, Lé c'mîn d'valait douochement par l'é bord d'la grande vallée, et au liain en bas y'avait eune mathe ou un rêsèrveux dg'ieau dg'un bliu cliai hardi doux, et un coup'son couèrt dé pliantes tchi 'tait vèrt et rose et orange; tout couleuthé dans l'solé. Mais y'avait un hâthîn tchi donnait l'êffet d'un portrait, quâsiment împressionniste.
Un cacheux d'motorbike 'tait pouor entrer dans lé c'mîn. Jé n'tait pon seux si les motorbikes 'tait pTrmînses dans chu c'mîn. Lé cacheux eut des diffitchultés à pousser sa motorbike entre les banques épis quand i' vînt a la pliaiche où'est qu'j'avais arrêté, j'fus happé contre la banque par les haves et vaûles qu'il avait sus l'driéthe d'la motorbike. Chenna né m'faîthait pon d'ma, mais jé n'pouvais pon bouogi. Auprès un moment ou deux lé cacheux d'motorbike mênagit d'faithe pâsser sa motorbike ava lé c'mîn et j'fus libéthé. Lé cacheux s'extchûthit l'avant à mé, mais j'lî dis qué ché n'tait rein et i' s'en fut rencontrer des gens (sans doute pouor aller à la pêque).
Rêvé l'27/11/2022
Viyiz étout: