J'tais dans eune salle tchi 'tait grée pouor un fricot ou eune fête, ofûche un annivèrsaithe dé mousse. La salle n'tait pon grande et y'avait eune tchuîsinne en vaîthinnant. Ch'tait tout modèrne. Y'avait des gens dans la salle, pon eune grande dgaîngue. D'un co eune janne Chinnouaise habilyie en nièr couothit hors d'la tchuîsinne. Ou 'tait chassée par un houmme tchi l'attrapit contre la muthâle et la tapit tchiques fais sus la tête atout eune pétite tchulyi en méta. La Chinnouaise tchit et rouôlit en avant et coumme ou rouôlait l'long du bas d'la muthâle d'la salle ou s'rap'tichait en rouôlant en boule et vînt coumme eune poupette. À la fîn n'y'avait rein d'restant d'la femme. Oulle avait dispathu. Mais ou sé l'vit dé iou qu'oulle avait 'té allouongnie en bas d'la muthâle. Ch'tait eune trique magique. Oulle avait ieu un rouôlot d'néthe marchandise auve eune poupette dédans et en tchiyant oulle avait laîssi dêrouôler l'rouôlot pouor donner l'împression qu'ou dispathaîssait.
Dans eune bibliothèque nou vendait des copies d'vièrs magâsîns. J'trouvis un p'tit magâsîn tapé à la machinne tch'avait eune poésie en Aur'gnais. Ch'tait entouor des gens d'la mé. Près d'la caûchie au bord d'la mé. Y'avait des rotchièrs, et souos l'ieau y'avait un creux coumme eune tonnelle qué nou pouvait vaie l'travèrs. À l'aut' bord y'avait d's ombres dé chein tchi pouôrrait êt' des loups-mathîns mais d'un moment à l'aut' i' sembliait qu'il' avaient des gambes. Mais nou n'viyait pon cliaithement souos l'ieau.
Rêvé l'29/6/2026
Viyiz étout: