J'tais pouor mé graie pouor aller à un concèrt tchique bord à la campangne et j'avais à décider tchi pièches qué j'tais pouor présenter. Y'avait deux-trais gens siez mé dans m'n appartènement tchi 'taient pouor aller au concèrt étout, et j'lus d'mandis s'il' avaient veu mes papièrs et livres. Épis d'aut' monde arrivîtent et bétôt m'n appartènement 'tait remplyi d'monde. J'dis ès gens qué ch'tait l'heuthe dé tchitter mais i' voulaient rester. Ch'tait qu'i' b'vaient et caqu'taient et 'taient pouor y faithe eune bordée. J'dis qué j'éthais à barrer l'us et qu'il' éthaient à lus dêhaler dêliêment. Mais i' n'faîthaient pon d'attention. Dans ma tchuîsinne jé trouvis eune êtchipe dé couques à graie des fricots pouor les vîsiteurs. J'lus dis d'lus en aller mais i' m'rêponnîtent qu'il' avaient 'té empliyés pouor coutchi ichîn et qu'la fonction avait 'té approuvée par l's Êtats. Épis j'èrmèrtchis par la f'nêt' (ma tchuîsinne 'tait achteu du bord du gardîn) qu'i' y'avait eune banque dé sablion. I' sembliait qu'lé gouvèrnément 'tait d'avis d'bâti eune entrée et des d'grés au but d'man gardîn pouor graie un accès par siez mé et siez mes vaîthîns. Jé c'menchis à pousser les gens hors d'siez mé.
Rêvé l'1/4/2023
Viyiz étout: