Les Pages Jèrriaises

Un rêve


J'tais dans un restaurant acanté ma parchonniéthe et ch'tait un restaurant à paîsson. Jé c'mandînmes des moûles auve du fronmage mais l'deuxième pliat à ma parchonniéthe fut sèrvi d'vant qué j'fînnîsse man preunmié pliat. Sus eune muthale y'ait un paysage en breunes lîngnes et ch'tait eune veue d'tchique bord dans l'Île dé Man tch'avait nom Bliulgh Tỳr (ou tchiquechose dé même), mais ch'tait êcrit d'difféthentes manniéthes et y'avait étout ...Tergh et ...Ter par exempl'ye. Jé m'extchûthis dé n'pouver pon prononchi l'nom viyant qu'i' y'avait tant d'difféthentes vâriâtions, mais un moussieu dans l'restauraunt m'explyitchi la prononchiâtion.

Nou m'baillit un vièr dôssyi remplyi d'progranmes dé l'Eisteddfod dé l'Île dé Man, et y'en avait d'dans tchi 'taient d's années 1920s et tchi cont'naient des translâtions d'poésies en Jèrriais par AA L'Gros.

J'avais à trouver la fanmil'ye d'un Bêlarusien tch'avait 'té médallé y'a bein d's années. Et y'avait eune pétite pliaque en méta tchi r'cordait l'histouaithe dé la médâle. Y'avait d's înmeubl'yes et j'trouvis l'nom d'la fanmil'ye à l'entrée dg'iun des blios d'appartènements. La fanmil'ye sé rêjouit d'aver veu la pliaque, mais pus tard tchitch'un volit la pliaque et j'm'en r'fus à l'înmeubl'ye mais y'avait ieu eune bastaude et y'avait du sang et du pité douothé sus la muthâle dé l'allée pouor graie un portrait d'pèrsonnages: y'en avait iun en sang et l'aut' en pité, mais i' 'taient quâsi êbliavés.

Rêvé l'24/4/2022
 

Viyiz étout:

 

Les Pages Jèrriaises