À Saint Hélyi y'avait comme eune vallée auve des vivièrs cârrés entouothés d'bliêté épis nou-s'entrait dans eune arcade comme la cheinne siez d'Gruchy tchi 'tait un aquarium dans eune tonnelle. Driéthe des grandes ôsaines tout l'long d'l'arcade y'avait des mouontréthies remplyies dg'ieau et d'bêtes mathinnes. Y'avait tchiques pétits paîssons, mais la grande attraction 'tait la collection d'pieuvres. Y'avait des pieuvres dé quâsiment toutes les couleurs, bliues, pourpres, oranges, rouoges, à lus r'poser sus des rotchièrs, toutes corlées. Les pieuvres 'taient pus à co grandes. Mais douoillies comme i' 'taient nou n'viyaient pon toute lus grandeu sénon quand il' aveingnaient lus gras pouor mouontrer lus bés. Des touristes Japonnais 'taient entchéthinnés par les pieuvres.
En s'dêhalant d'l'arcade, j'feûnmes dans la Grande Rue. Y'avait des tramouais tchi pâssaient dans la rue. Par la carre j'entrînmes dans Les Ruettes mais dans l'aut' sens, j'têmes à marchi du Nord au Sud. Les tramouais 'taient à deux êtages auve lé corps en pannieaux d'bouais peints en vèrt foncé. La peintuthe 'tait toute neuve, et les tramouais 'taient nets, sans brit et allaient quédaine. Y'avait un nom peint en rouoges lettres sus les tramouais: "...LINES" mais jé n'pouvais pon liéthe dé iou qu'les tramouais 'taient v'nus.
J'pâssînmes eune neuve boutique dans la rue, tch'avait 'té grée pouor èrsemblier à eune vielle boutique, auve d's allées êtraites et d's ais remplyis d'marchandises. Les machinnes 'taient à haut sus l'preunmié êtage, et j'tais pouor acater un aspithateu pouor m'n annivèrsaithe. Aniet ch'tait Dînmanche et m'n annivèrsaithe 'tait pouor Mardi, et jé n'savais pon tchil' arrangements qu'mes anmîns avaient accordé. J'èrgardis dans man journal mais jé n'tais pon seux si j'allêmes nos rencontrer Lundi ou Mêcrédi. L's anmîns dîtent qué ch'tait pouor vaie.
Rêvé l'19/9/2022
Viyiz étout: