Les Pages Jèrriaises

Un rêve

Y'avait des terreuristes, ou des ouéthous, tchi nos m'nichaient, pouor tchique raison. J'têmes dans eune maîson, et des soudards, ou des gardes, vîntent nos protégi et pouor nos mouontrer comme tchi faithe sèrvi les armes automatiques contre les assâsîns. Ches fûsis 'taient grands et nièrs et hardi avanchis et complyitchis auve des boutons et des lâseurs, et ch'tait d'même coumme les cheins des terreuristes, ou crînminnels. N'y'avait pon tout coumme hardi d'boulets et les soudards gardaient les boulets. I' fut d'mêtchi d'tchitter la maîson et j'nos en feûnmes, auve les soudards tchi nos gardaient. Mé, j'avais à r'condithe un moussetchot, tch'avait ofûche dans les dgiêx ans, mais j'n'avais pon d'boulets pouor mén arme, mais ch'tait d'vaie si l'appathence du fûsi pouvait dêcont'nanchi les cheins tchi nos attaqu'thaient. Y'eut quâsiment un dro quand un mousse geuthit et j'l'éthais tithe sénon qué j'n'avais pon d'boulets pouor mén arme. Lé soudard tchi nos gardait, mé et l'moussetchot, nos m'nit en seûth'té. Eune néthe d'mouaîselle arrivit dans eune tchaîse à reues. Ou 'tait eune chantérêsse, ou tchique célébrité, et y'avait un tas d'monde dé v'nu la vaie. Mais lyi étout 'tait pouor no sauver des terreuristes, Et sa tchaîse à reues 'tait manniéthement un dêdgîthement, ch'est en tchi ou pouvait marchi drait quand ch'tait d'mêtchi. Oulle avait eune parqu'thie à cârrosses où'est qu'ou gardait les cârrosses pouor ses touônnées d'chant'tie. Sus les cârrosses y'avait d's affiches auve sa fache dessus tch'annonchaient ses concèrts, mais quand j'arrivînmes à la parqu'thie, des gens 'taient à trillachi l's affiches dé sus la cârross'sie à seule fîn qué j'pûssions êcapper.

Rêvé l'26/6/2023
 

Viyiz étout:

 

Les Pages Jèrriaises