J'tais à pédaler sus eune grande route à Saint Brélade. Jé dêtouônnis sus eune pétite rue tch'amontait un mio épis d'vînt raide et rude. La rue n'tait d'aut' tathée, mais sablionneûthe auve des touffets d'hèrbe tchi spartissaient lé c'mîn dans des cannieaux. La lînmite d'ièrre 'tait à vîngt milles à l'heuthe et j'viyais qué j'allais à raîque dans les huit kilomètres à l'heuthe. Mais y'vait eune vaituthe driéthe mé, dé tchi l'cacheux voulait m'pâsser mais n'y'avait pon assez d'laîze. Lé c'mîn c'menchit à d'valer. Y'avait eune veue sus la côte et la mé. L'solé lithait. J'dêtouônnis sus iun des "cannieaux" du c'mîn et j'prîns eune sente êtraite tchi montait. Bétôt j'tais sus un manniéthe d'ais en chînment au pouorpourtant d'eune muthâle dé gardîn. Y'avait des tigues ou des ronches tchi craîssaient par d'ssus la muthâle, et jé n'pouvais pon aller pus liain pa'ce qu'i' sembliait qué la sente est dév'nu partitchuliéthe et n'y'avait pon un accès d'èrtou à la mé pus liain. J'éthais à grîmper par d'ssus la muthâle auve ma bike et trouver la continnuâtion du c'mîn. Un co d'l'aut' bord d'la muthâle, j'viyais l'avant à mé des maîsons d'campangne en brique auve des bels et des gardîns et j'm'adonnis dans la carre d'un bel tch'ait eune cache. Y'avait d'la vèrduthe sus la muthâle à s'nêtre à la haûteu d'ma fache et j'apèrchus dé tchi tchi bouogeait parmi les fielles. J'eus un apèrton d'plieunmes lithantes couleuthées. ch'tait coumme eune pèrdrix, mais coumme ou bouogeait j'yiyais entré les fielles qué ch'tait pus à co coumme un pigeon couleu d'pèrdrix. L'ouaîthé 'tait tout près d'ma tête et j'èrmèrtchis qu'il avait eune têtchiéthe en fi d'fé et eune pétite cage en fi d'fé pendue l'avant à san bé. Dans la cage y'avait un dé d'sannouiche tchi pathaîssait cont'nîn du poulet à la mayonnaise. L'ouaîthé bécotait la sannouiche dans la cage.
Rêvé l'29/1/2023
Viyiz étout: