I' 'tait d'mêtchi d'faithe un appouaintement en Russie pouor aver la pé d'ma pinne copée. J'm'en fus siez la docteûthe (tchi 'tait p'tite, grôsse, et pus à co pliaîthante, mais hardi embarrassée) et ou m'mouontrit un p'tit pot en vèrre et înditchit qu'la quantité d'sang n'couvrithait dgéthe lé fond du pot.
Y'avait eune Gallouaise là en même temps. Ou n'avait pon fait un appouaintement pouor san fis, un janne homme, mais ou voulait saver entouor la papel'lie pouor l'opéthâtion d'cop'thie d'pé viyant qué ché s'sait d'mêtchi d'traduithe les dotchuments en Bréton.
Driéthe mén appartément y'avait un clios ou un pré laîssi paître ès coucous, et j'rêalîsis qué ch'tait à mé, et j'pouôrrais don r'muer des pliantes dé d'dans man gardîn dans l'clios. N'y'avait pon d'cliôtuthe ou fôssé l'tous du clios, ch'tait raîque d'la bliête à longue hèrbe auve comme si ch'tait des vielles bordeuses au but. Lé tou y'avait des c'mîns à pid et d's entrées à des maîsons et ché n'tait pon aîsi d'trouver eune taque conv'nabl'ye pouor y plianter dé tchi sans êt' à la vaie des cheins tchi voulaient pâsser. La peintuthe sus les bas des bâtisses à l'entou p'lait d'sus les muthâles. J'tâchais d'transplianter un rôsyi, mais l'rôsyi n'avait pon hardi d'rechinnes et la tèrre 'tait pus à co pons'leuse.
Rêvé l'1/8/2022
Viyiz étout: