Les Pages Jèrriaises

Un Rêve

Y'avait un grand bâtisse néo-Gothique auve des f'nêt's et d's ailes à d's angl'yes. Ès bas y'avait eune assez p'tite entrée dans eune allée dans tchi qu'i' y'avait eune réception pouor Sa Majesté l'Rouai Charles III, not' Duc. Quand les gens entraient, il' allaient sait à s'nêtre pouor êt' présentés à la Reine Camilla, sait à dêtre pouor êt' présentés au Rouai Charles. Quand j'entris, j'fus à dêtre et nou m'présentit au Rouai.

J'avais trop d'pouques à patchi et trop d'habits. En arrivant, j'avais mîns trop d'habits, et j'décidis qué j'éthais à laîssi d's habits à la maîsion où'est qu'j'avais 'té louogi. J'm'en fus sus ma bike pouor aller à l'aéroport lé travèrs dé la campangne. I' 'tait l'hivé et l'paysage 'tait d'la né et d'la gliaiche, mais ch'tait aîsi d'pédaler dans les ruettes. Jé pâssis des mousses. Au pouorportant d'la ruette y'avait un canné g'lé. Les mousses pouvaient marchi sus l'canné, mais quand j'pédalis sus, la couoche dé gliaiche sé bûchit et mé v'là à pédaler dans l'ieau. Mes pids bottés et les bas d'mes braies 'taient trenmpés et j'pédalis hors l'ieau, d'èrtou sus lé c'mîn. Mais ouaithe qué mes pids fûssent mouoillis, l'ieau n'sembliait pon fraide.

Y'avait un ours tch'est dév'nu un mio sauvage, et i' n'pouvait d'aut' rester à la maîson. I' 'tait d'mêtchi d'l'endormi à tréjous. Mais l'ours, tchi 'tait hardi grand, voulait jouer dans la chambre, auve les livres. Par bordée l'ours 'tait trantchil'ye épis i' dangélait. À la fîn j'mênagis d'lî donner la pitcheûthe, et j'dis au monde qué j'avais endormi l'ours, tchi sembliait un pitchi.

Rêvé l'5/1/2023
 

Viyiz étout:

 

Les Pages Jèrriaises