Lé solé happait les fis d'Saint Miché dans l'clios au ras d'la fèrme où'est qu'l'auteu d'cantiques avait d'meuthé. 'J'ait là acanté eune auteûthe Améthitchaine et s'n assistant dé filméthie. Ou r'chèrchait des înformâtions entouor la vie dé ch't auteu d'cantiques tch'êcrivait des patholes pouor des airs dé cantiques ou sieaumes, des vèrsions Jèrriaises. L'auteûthe 'tait à êcrithe un livre et voulait pâler auve des gens tch'avait connu l'auteu d'cantiques. J'têmes à la campangne pouor un dotchumentaithe ou entréveue entouor san travas. Jé n'sis pon seu si j'tais s'posé d'êt' là ou si j'tais là sîmpliément à la frouque.

Épis j'têmes dans eune chapelle Méthodiste, mais ou 'tait hardi grande, trop grande pouor êt' eune chapelle. Ch'tait pus à co comme eune grande églyise. Y'avait un sèrvice en allant et nou chantit ieune des vèrsions dé ch'auteu d'cantiques. Mais l'accompangnément en musique n'tait pon bouôn, tchitch'un l'avait changi ou modèrnîsé, et y'eut du hèrtchîn parmi la congrégâtion. Et v'là tch'arrivit eune dgaîngue dé sonneurs auve des înstruments en pâlîn (et habilyis dans des p'lisses) pouor èrjouer lé cantique dé mêtchi.