J'tais dans l'bel en gravyi ou tèrre battue d'un grand collège ou châté, ou d'tchique înstitution auve des vièrs bâtisses tout l'tou du grand bel cârré. Et nou vînt pliaichi là un liet (dans la carre) à seule fîn qué pûsse y dorni à la belle êtaile - mais lé solé lithait et ch'tait l'arlévée.
J'tais assis au liet quand eune femme geuthit et m'offrit eune partie d'eune médale en argent. J'avais eune partie d'la médale tchi 'tait pouor donner à un mûsée (ou tchi 'tait empruntée dé d'dans un mûsée, mais les bâtisses lé tou du bel n'taient pon l'mûsée). La partie d'la médale qué j'avais 'tait comme eune partie d'eune pièche dé chînquante pénîns mais pus grande. Lé bord avait des carres et la médale 'tait copée ou spartie d'auve des vèrques. Et ch'tait d'même pouor la pièche dé médale qué la fomme offrait: des carres d'un bord et des vèrques dé l'aut'. La médale n'avait pon 'té avrônée par aver 'té copée; ch'tait eune partie d'la construction d'la médale et les pièches 'taient s'posées d'cadrer. J'prîns l'aut' partie d'la médale et les deux parties clyitchîtent ensembl'ye atout un moueu au mitan. Les deux pièches 'taient irrédguliéthes et ieune 'tait pus grande qué l'aut', mais manniscorbulées i' fîtent les deux-tchièrs d'eune médale à dans les sept carres. La médale lithait au solé.
Jé m'dêhalis du liet et j'fus acanté la femme à eune office dans les bâtisses à l'aut' bord du bel. Ch'tait l'office d'eune înstitut dé tchique sorte, auve des ais pouor les livres et les papièrs, et y'avait des plians et des dgiagranmes sus des tabl'yes en bouais. La femme quémenchit à faithe des lîngnes sus des plians en des difféthentes couleurs atout des plieunmes, des ribans et à la fîn eune canne à sprayer. Ou mèrtchit de lîngnes tch'allaient hors des papièrs et continnuaient sus les tably'es épis pus liain qu'les bords des tabl'yes.
J'fus tchiquebord d'aut' épis j'réalîsis qu'j'avais laîssi les parties d'la médale dans l'liet dans l'bel. Et ch'tait d'vièrs la fîn d'l'arlévée et j'eus à couôrre pouor èrvénîn au liet ramâsser la médâle d'vant la freunm'thie d'l'înstitut. Y'avait un tas d'vîsiteurs par les c'mîns entre les bordeuses dans les gardîns l'tou du bel et j'couothis l'travèrs des fliotchet d'monde.
Dans un train souôtèrrain, j'têmes dans eune stâtion où'est qu'lé trais 'tait arrêté, et un înspecteux vînt dans l'ouadgîn pouor annonchi qu'des pâssagièrs avaient à tchitter l'train. Épis i' nos annonchit qu'touos les pâssagièrs dévthait tchitter, et chenna auve nous, et d'laîssi driéthe les bagages, pouque et poutchie. Y'avait étout un dêteingneux d'brûl'lie êtravl'é dans l'aithe entre les sièges. J'dêbèrtchînmes, ayant laîssi nos pouques pendues l'long des f'nêt's. Et l'train s'en fut - mais l's aut's ouadgîn 'taient remplyis d'pâssagièrs. Raîque not' ouadgîn avait 'té clièrgi, et l'train 'tait s'posé d'èrvénîn à seule fîn qué j'pûssions continnuer not' viage. Mais sus la pliateforme, nous jé n'savêmes pon quand tchi qu'lé train r'veindrait et pouortchi qué j'avêmes 'té poussés hors.
Pouor aller à la Pompe dé Haut y'avait un système bein complyitchi pouor les bikes, et y'avait un tas d'piêtons par les c'mîns et à la crouaîs'sie. Des cacheurs dé vaituthes n'taient pon contents qu'les bikes 'taient allouées d'touônner amont l'mont, mais lé c'mîn à bike 'tait mèrtchi sus la rue tathée. Ché n'tait pon aîsi d'vaie tout comme où'est qu'nou dévthait touônner. La rêunnion pus tard 'tait ofûche à Saint Ouën.
Rêvé l'1/10/2022
Viyiz étout: