J'tais dans un thiâtre Estonnien où'est qu'nou présentait sus la strade eune production d'eune pièche entouor eune légende un mio coumme lé Pifreux Pielé d'Hamelîn. La pièche avait nom tchiquechose coumme "Con Cornac Jean". La présentâtion 'tait bouonne. Lé janne houmme tchi 'tait l'grand caractéthe 'tait habilyi à la Victorienne en brun/jaune fa et tappeur. Épis y'avait des mousses, habilyis coumme li, auve des p'tits tappeurs et auve la clié d'la chaûdgiéthe ès faches, tchi couothaient partoute la strade en faîthant des brits coumme la caqu'téthie d'rats et des gestes atout lus mains coumme les cheinnes dé pattes dé rats. Ché n'tait pon cliai s'i' jouaient des mousses ou des rats. Jé n'pouvais pon comprendre lé scrit viyant qué ch'tait en Estonnien.
Auprès la présentâtion d'la pièche y'avait un fricot dans eune salle où'est qu'nou 'tait pouor sèrvi du rat rôti à la broche. J'arrivis dans la salle d'vant l's aut' învités, et j'èrgardis les rats. Y'en avait d's assiettées d'eune d'mié-douzaine ofûche dé difféthentes èrchettes: des rats rôtis dans les difféthentes sauces. Les rats avaient dans les vîngt centimètres dé long et 'taient coumme des buts d'poulet. J'prîns tchiques rats sus eune assiette pouor gouôter, et un aut' moussieu geuthit pouor prendre eune assiettée d'rats étout.
Épis j'tais sus la grève. Lé ciel 'tait nièr et i' ventait dû. J'tais au haut d'eune montée dé d'grés en grannit tchi d'valaient sus l'sablion. J'restis à haut pouor eune pause épis j'décidis dé d'valer. Mais j'tais si êbézoui et i' ventait si dû qué j'avais à m'croch'ter à la balustrade, un d'gré à la fais en d'valant viyant qu'tout craûlait tant. Ché n'tait pon aîsi dé d'valer en seûth'té mais à la fîn j'arrivis en bas, sus l'sablion et j'm'arroutis par la grève d'vièrs l'Êst où'est qu'i' y'avait eune caûchie ou d'valeux à un but au liain.
Rêvé l'13/3/2024
Viyiz étout: