Un rêve

J'tais en Améthique du Sud à eune conféthence dé sport. J'tais un membre d'eune dgaîngue dé d'lédgis politiques du sport Britannique, et j'n'en savais rein. Nou m'avait laîssi auve les organnîsateurs des sports Britanniques et l's entchéthinnés à eune séthée d'présentâtion dans eune grande salle. Les organnîsateurs avaient grée des présentâtions en vidgo pouor présenter lus plians pouor lé grand sport. Y'avait eune annînmâtion d'criatuthes tchi lus dêhalaient du pité pouor couôrre en êvoluant comme bêtes dans eune course dans tchi qu'i' rentraient et lu r'dêhalaient du pité.

La séthée 'tait caude et y'avait en d'houors d'la salle un bel et des gens assis à des p'tites tabl'yes et des bancs en pièrre. J'tais habilyi dans eune grande blianche quémînse en lîn. Sophia Loren 'tait là auve des gens et coumme jé pâssais ou m'prînt par lé bras et voulait m'faite l'èrjouaindre à sa tabl'ye en dithant qué j'tais bé, Mais jé m'craînchis et m'en fus au but du bel.

Y'avait un compliot, et nou d'mandait des sou à tchiques seigneurs habilyis coumme au dgiêx-huitchième siècl'ye, et à la vielle poste où'est qu'nou-s'avait 'té s'posé d'laîssi les sou dans eune aûmathe n'y'avait pon d'sou mais y'avait dans l'aûmathe un portrait d'trais seigneurs habilyis coumme au dgiêx-huitchième siècl'ye et un dgèrnissement. V'là tchi n'tait pon chein qu'j'avais espéthé, et j'éthais peu autrément dêmuchi l'affaithe.

Rêvé l'27/10/2021