J'têmes à Rennes, eune dgaîngue dé nous, et dans eune rue un touriste nos achîtrit, ch'ait un nièr Améthitchain, tchi nos d'mandit d'l'aîgue. Ch'est en tchi il s'tait înstâllé justément dans eune hôtel modèrne au but d'la rue et nou li'avait dit là qu'i' y'avait un supèrmarchi justément par la carre, mais il avait marchi un but avaû chutte rue-là et lé v'là achteu au d'sans d'trouver l'supèrmarchi. Y'avait eune lîngnie d'bouais dans la rue et l'architectuthe des bâtisses 'tait pliaîthante.
Heutheusement j'èrconnus l'hôtel car j'y'avais 'té y'a tchiques années et ch'tait vrai qu'i' y'avait un supèrmarchi hardi d'amain par la carre mais qu'chenna s'trouvait pus liain avaû la rue qu'nou-s'éthait creu et ch'tait un mio muchi. Mais la situâtion 'tait entout êtrange viyant qué ch't' hôtel-là n'tait pon à Rennes mais dans eune aut' ville qué j'avais vîsité.
Mais, un p'tit but pus liain j'trouvînmes lé supèrmarchi, un mio muchi pa'ce qué l'entrée 'tait cârrée d'la rue, et y'avait un bel ou eune pièche l'avant à l'entrée. Lé supèrmarchi 'tait bâti en grises briques. N'y'avait pon d'vaituthes partchies l'avant à l'entrée, mais pouor tchique raîson l'bel 'tait couèrt dé d'gâts: des grôsses pièrres, des buts d'méta... comme si y'avait ieu eune dgèrre ou eune batâle tchi y'avait laîssi tout chenna.
Au fond, au but d'la rue et driéthe lé supèrmarchi, y'avait des bouaîs'sies et des p'tits monts et des prés et nou 'tait quâsiment à la campangne et y'avait un contraste entre lé gris d'l'ênorme supèrmarchi et l'vèrt du paysage auve des belles maîsons auve des liefs en tîles parmi les bouais.
J'nos en feûnmes lé travèrs du bel à l'entrée du supèrmarchi. Les portes en vèrre et acyi sembliaient aver 'té ligiéthement avrônées par eune brûl'lie d'la dgèrre mais autrément par dédans toiut sembliait comme i' faut.
Rêvé l'20/2/2022
Viyiz étout: