Y'avait deux fréthes à La Pouquelaye. Iun dg'ieux avait un r'cord crînminné, mais l'aut' 'tait înnouothant et respectait la louai. Tout coumme quand l'fréthe înnouothant fut douté dans eune entchête d'la police, lé fréthe crînminné n'voulait pon qu'san fréthe fûsse tchestchionné, car v'là tchi dêmuch'chait d'ses maûfaits. Quand un détecti vînt pâler au fréthe, lé mauvais fréthe lî pouaintit dans l'pétra atout san bâton. Mais l'bâton 'tait en véthité eune arme dêdgîthée et l'fréthe tithit au detecti dans l'pétra et l'tuit.
J'tais dans eune salle remplyie d'monde acanté eune êtchipe dé filméthie d'Belgique: deux hoummes et eune d'mouaîselle tchi 'tait eune journaliste. J'lî pâlais entouor dé tchi, et j'lî dis qué j'tais întérêssi dans l'meurtre dé La Pouquelaye et j'tais pouor êcrithe eune articl'ye entouor.
Dans la salle y'avait étout un gris j'va d'pantomînme. Jé lî fliattis la tête, épis l'dos pouor encouothagi les deux hoummes dédans, mais nou n'connaîssait pon tchi qu'i' y'avait d'dans l'dêdgîthement dé j'va.
J'têmes pouor aller au studio pouor l'entréveue auve les journalistes Belges. Et lé c'mîn 'tait l'travèrs d'un par ou gardîn l'avant à l'églyise dé chutte ville. Lé solé lithait et tout 'tait bé. Y'avait un tas d'flieurs sauvages flieuthies dans l'gardîn tchi pouôrrait êt' un hardi grand chînm'tchiéthe. Y'avait des jaunes flieurs et j'dis à la journaliste Belge qué j'avais oublié l'nom d'ches flieurs-là. I' 'tait un mio coumme du pipot ou du morrhouiton ou des pîssenliets ou des jaunes pavots. Y'avait un tas dé p'tites bliues flieurs étout. L'avant à l'églyise au liain y'avait un tas d'monde habilyis dans des bieaux habits couleuthés. L'églyise 'tait hardi belle, bâtie dans d'la pièrre couleu d'crème et au run d'un cliochi y'avait un haut vièr trais-carres stchulpté au d'ssus du porta. J'dis qu'l'églyise 'tait belle mais j'n'l'avais pon rêalîsé d'vant viyant qu'l'églyise 'tait bâtie driéthe eune êtendue d'la vielle muthâle d'la ville, haute et forte auve des crénellâtions d'ssus. Pouor l'entréveue nou nos m'nit dans l'châté mais nou n'trouvit pon l'bouôn c'mîn pa'ce qu'i' y'avait tant d'gal'lies et d'us.
Rêvé l'2/4/2023
Viyiz étout: