Les Pages Jèrriaises

Un Rêve

Y'avait eune dgaîngue dé nous à vîsiter la Tchèquie. Et j'feûnmes vaie eune unnivèrsité. L'unnivèrsité avait 'té fondée y'a dans les deux chents ans dans un vièr bâtisse mais avaû l's années oulle avait acaté des bâtisses et tèrrains jouaingnants pouor faithe un quartchi unnivèrsitaithe dans la ville. L'unnivèrsité avait même acaté la vielle caûchie au bord dé l'ieau et lé p'tit palais tchi 'tait à l'entrée d'la caûchie.

Toute l'histouaithe du dêv'loppement d'l'unnivèrsité 'tait mouontrée sus un êcran à touches dans eune grande halle. Y'avait eune annînmâtion tchi mouontrait coumme tchi et quand tchi châque bâtisse et tèrrain avait 'té ajouôté, atout des difféthentes couleurs. La caûchie 'tait la dreine partie d'la cliôsée unnivèrsitaithe ajouôtée et modèrnîsée.

Dans la grande halle, tout l'tou y'avait des salles, et des cafés, et même des boutiques.

À côté d'l'êcran d'mouontréthie dans la grande halle, y'avait eune douche contre la muthâle. N'y'avait pon d'ridgieau ni d'porte, la douche 'tait ouèrte, quâsiment comme d'la technologie exhibée. Ch'est en tchi n'y'ait pon d'coq ni boutons dans la douche. Tout 'tait contrôlé sus l'êcran à touches. J'poncis sus eune partie d'l'êcran, et du savon litchide quémenchit à couler dé d'dans eune partie d'la muthâle d'la douche. Jé n'pouvais pon l'arrêter. J'fus à la douche pouor êprouver d'arrêter la coul'lie d'savon, mais jé n'pouvais pon l'faithe. Mes mains 'taient couèrtes dé savon couleu d'rose ou orange, et jé r'fus à l'êcran pouor ponci sus tout chein tchi pouôrrait ofûche arrêter l'savon. Ché n'tait pon aîsi viyant qu'mes mains 'taient couèrtes dé savon et mes dés drissaient sus l'êcran. À la fîn j'mênagis d'ponci sus la bouonne partie d'l'êcran.

Ch'tait l'heuthe dé tchitter la halle dé l'unnivèrsité et j'avais à arreuner mes acats. J'avais acaté des potées d'pliantes et un grand fliamant en pliastique. J'avais raîque trais pouques et jé n'pouvais pon patchi tout dans les pouques. J'décidis d'laîssi un coupl'ye dé pliantes et l'fliamant dans la halle.

En d'houors du bâtisse dé l'unnivèrsite, dans la rue l'taxi 'tait à nos espéther, mais j'rentris dans la halle eune dreine fais pouor vaie chein qu'j'avais laîssi driéthe. Au fond d'la halle, assis auve des anmîns à eune tabl'ye dans un café, né v'là man fréthe. Jé n'savais pon qu'i' 'tait v'nu en Tchèquie et i' n'savait pon nitout qué j'tais là.

Man fréthe m'èrmèrtchit mais n'dit mot. I' m'lanchit un co dg'yi et né v'là tout.

J'dis bouônjour, et nou m'rêponnit auve bouônjour à matîn pa'ce qu'i' 'tait dêjà pâssé mînniet. Tchitchun m'pâssis un papi sus tchi ch'tait êcrit qu'j'avais eune belle vouaix mais man tchu avait 'té malement grée.

Rêvé l'5/2/2023
 

Viyiz étout:

 

Les Pages Jèrriaises