J'tais à pédaler à la campangne en Angliétèrre acanté un coup'lye d'anmîns. J'pédalêmes lé travèrs des clios. Y'avait des c'mîns en tèrre bein êtraits tchi crouaîsaient les clios. Tout 'tait vèrt et l'solé lithait. Ch'tait hardi paîsibl'ye. Mais m's anmîns pédalaient trop quédaine et i' m'laîssîtent driéthe. J'pédalis pus quédaine à seule fîn d'les rattraper et bétôt j'tais souotre ieux par des c'mîns tchi d'valaient des côtis épis des raides monts couèrts d'hèrbe. J'tais quâsiment à drisser ava des sîl'yes dé mont hardi raides, mais n'y'avait pon d'dangi. Et en d'ssous d'mé j'viyais l'paysage auve des clios et des bouais et des fôssés. J'vîns au pliat et j'ratrappis m's anmîns épis j'vînmes à eune êcole, et sus l'tèrrain à cricket un tas d'mes vièrs anmîns d'l'êcole 'taient à jouer. Jé n'les avais pon veu d'pis d's années et achteu i' 'taient aussi vieillis qu'mé. Nou s'en fut à la chapelle, tchi 'tait grande coumme eune cathédrale, auve un huit-carres dé bancs au mitan où'est qu'lé tchoeu 'tait pouor pratitchi. Sus les bancs y'avait des livrets d'musique auve des couvèrtuthes en rouoge tchui et l'nom du compositeu mèrtchi sus en vielles lettres d'or: "Xavier Gabrieli".
Rêvé l'9/7/2024
Viyiz étout: