Ch'tait coumme j'tais d'èrtou à l'êcole pouor eune vîsite ofûche, et y'avait tchique activité en allant auve des grôsses têtes. Les grôsses têtes lus en fûtent à la chapelle pouor un sèrvice mais nous et l's aut' j'restêmes driéthe. Mais auprès eune pause jé décidis d'aller à la chapelle. Lé sèrvice 'tait en allant et j'eus à crouaîsi l'allée d'la chapelle pouor m'assiéthe sus un banc d'l'aut' bord. I' pathaîssait qu'un tas d'monde avaient décidé d'aller au sèrvice. Nou 'tait à chanter un cantique entouor des ouaîsieaux. J'n'en r'connaissais pon l'air. Sus l'ais du banc y'avait un livret d'sèrvice sus du bliu papi, et j'y trouvis l'cantique. À ma surprînse ch'tait un texte dé George d'La Forge, ieune d'ses articl'yes d'la gâzette copiées sus eune fielle du livret et ch'tait coumme eune mauvaise photocopie d'bâsse qualité. Nou-s'avait èrproduit toute l'articl'ye, mais nou chantait raîque eune partie. Dans l'articl'ye George d'La Forge explyitchit eune convèrsâtion auve un anmîn entour la r'ligion et s'n anmîn pus tard li'avait envyé un texte des Êcrituthes - du livre dé D'nîn, ou ch'tait-i' un chant app'lé un d'nîn, d's Êcrituthes Musulmannes ou Juives? Ch'tait coumme un sieaume, et ch'tait entouor l's ouaîsieaux. La musique continnuit auprès la chant'tie du texte du D'nîn et la congrégâtion n'savait pon s'assiéthe ou rester mâtée. Les grôsses têtes restaient mâtées.
Rêvé l'9/10/2023
Viyiz étout: