J'tais dans la boutique d'un mûsée en Êcôsse. Jé n'tais pon d'avis d'vîsiter l's exhibitions mais j'voulais acater d'tchi dans la boutique. J'tais pouor payi auve des billes, mais j'ai oublié tch'est qué ch'tait qué j'avais chouaîsi pouor acater. Sus l'compteux d'la boutique, quand j'avais ouvri man porte-billes, jé trouvis des billes Êcôssaises, pliées et achuchotées, qué tchitchun avait laîssi là. Y'en avait ofûche deux billes là, et j'crai qué ieune dg'ieux 'tait un dgiêx-louis Êcôssais, un mio bliueâtre. J'dis au vendeux driéthe lé compteux qu'i' vaudrait ajouôter les billes au trésor au pèrsonnel, si fis d'âme né v'nait pon les r'cliâmer. Lé vendeux 'tait hardi r'mèrciant, et m'dit qué j'n'éthais pon qu'faithe dé pâsser l'travèrs des exhibitions pouor m'en dêhaler du mûsée. Ch'est en tchi la boutique 'tait à l'entrée du mûsée mais ch'tait contre les règly'es dé tchitter par la porte d'entrée et les vîsiteur à la boutique avaient à pâsser par lé mûsée pouor arriver à la sortie. Mais l'vendeux m'dit d'pâler au policemainne à l'entrée tchi 'tait bein grand et hardi qv'nant et m'proposit dé m'faithe pâsser par la prison au run d's exhibitions. I' m'emm'nit à eune porte dé seûth'té tchi 'tait l'entrée d'la prison d'jannèche et m'dit d'mett' eune castchette tchi 'tait eune partie d'l'unniforme des jannes prisonnièrs à seule fîn qué j'pûsse pâsser par la prison dêdgîther en prisonnyi. Il en avait trais d'ches castchettes en tartan et j'en prîns ieune. I' 'tait hardi confortabl'ye et bein faichonnabl'ye. J'pâssînmes tchiques aîtres et j'nos dêhalînmes en d'houors d'la prison dans un bel oû'est qu'des jannes prisonnièrs avaient happé la pathe d'la prison et voulaient êmoûtchi du hèrtchîn.
Rêvé l'17/2/2022
Viyiz étout: