Les Pages Jèrriaises

Un rêve

J'tais acanté un moussieu, un înspecteux tchi 'tait v'nu înspecter des c'mîns ou des maîsons à la campangne et j'tais pouor li'explyitchi l'histouaithe du vaîthinné. Y'avait d's ouvrièrs tch'avaient freunmé les c'mîns, et mé et l'înspecteux nos pronm'nînmes lé tou des maîsons. I' faîthait bé et l'solé lithait entre les bouais. Y'avait des grandes maîsons d'campangne tch'avaient 'té transformées d'vielles maîsons d'fèrmes et y'en avait tch'avaient des caches dé laîze à l'entrée. Entre les grandes maîsons y'avait des caûminnes, et j'explyitchis à l'înspecteux comme tchi qu'les clios avaient 'té dêv'loppés avaû l's années et ché s'sait bétôt qu'la Ville s'êtravèl'lait jusqu'ichîn pouor couvri la campangne.

Entre chu vaîthinnée et la côte y'avait un tèrrain d'golf où'est qu'des hommes 'taient à jouer épis y'avait des gardîns tchi d'valaient jusqu'à la grève.

Dans les gardîns y'avait un fliotchet d'monde au solé et sus la pronm'nade étout. Jé d'valis jusqu'à la pronm'nade épis j'ramontis par les gardîns. Y'avait des gens assis sus la bliête et y'avait des bouais auve des rondes fielles dé toutes les couleurs. Les fielles tchiyaient et v'là tchi lus arreunaient dans des tas comme si chenna avait 'té plianné comme eune partie du design des gardîns. I' faîthait pus à co caud: lé monde 'taient habilyis en habits d'Êté, mais s'nou-s'en jugeait par la tchête des fielles et les couleurs des fielles sus les bouais, ch'tait au Stembre.

Rêvé l'10/11/2022
 

Viyiz étout:

 

Les Pages Jèrriaises