J'arrivis dans eune êcole sus ma bike. Jé poussis ma bike par dédans l'êcole et 'tais pouor partchi la bike dans eune allée entre les portes dé deux salles. Mais eune femme s'dêhalit d'la porte à s'nêtre et m'achîtrit et mé m'nit dans la salle, où'est qu'i' y'avait un liet auve des bliancs lîncheurs. La femme 'tait habilyie en blianc à la mode du dgiêx-huitchième siècl'ye, auve un grand blianc bonnet sus sa tête. Ou m'dit qu'la cliâsse 'tait prête - chein qué j'n'avais pon espéthé. Nou mé m'nit dans eune salle dé cliâsse tchi r'sembliait au d'dans d'un avion, auve des sièges et les bords d'la cosse dé l'avion en rouoge, mais i' n'y'avait pon dé f'nêt's. Y'avait deux êtudgiants et deux maît's et ch'tait pouor tester l'expéthience d'êt' dans un avion. Un engîn stèrtit et y'eut un ronnais et l'avion tressonnait coumme si ch'tait pouor avoler. Mais jé savais qué ch'tait raîque eune testéthie et j'm'êtalvachis sus des sièges. Lés maît's dîtent ès êtudgiants d'êtreindre lus cheintuthes dé seûth'té mais mé j'n'avais pon à mett' la cheintuthe viyant qué j'tais êtalvachi au run d'êt' assis. Mais l'avion sembliait rêellement pouor s'avoler et j'eûnmes la sensâtion d'êt' hauchis dans l'air et qué ch'tait en véthité un avion au run d'eune salle dé cliâsse. Auprès un brîn un us au ras d'mé s'ouvrit et j'vis qué j'têmes dans l'air au d'ssus d'la mé. Les louêmes 'taient rudes et y'avait un navithe à vailes et d's êparts. Mais j'rêalîsis qué ch'tait tout faux: ch'tait eune projection.
Rêvé l'19/10/2026
Viyiz étout: