Un rêve

J'mîns un jaune tee-corset et j'm'en fus l'travèrs du Vièr Marchi. Eune nouvelle louoge dé Francmachons avait 'té justément autorisée et nou m'avait învité à la lanch'chie.

J'arrivis à la salle dans un grand bâtisse tchiquebord en Ville (ché n'tait pon au Templ'ye Francmachonnique). À l'entrée j'dis qué j'n'avais pon mîns d'fa mais j'avais mîns man jaune tee-corset. L'huissyi m'dit qué ché n'tait pon d'tchi. Tout coumme j'tais un tout p'tit mio gêné pa'ce qu'tout l'monde d'aut' 'taient attînfés dans des fas à câsaque à coue d'héthonde auve des chaînes dé mouontre, des médales, des boutons en argent ou or et y'avait des femmes bein habilyies étout parmi l'fliotchet d'monde. Et nou v'nait m'atchilyi et m'dithe qué ch'tait un pliaîsi dé m'vaie à la lanch'chie d'la louoge et mé tchi disais qué jé n'tais pon un Francmachon mais ch'tait un pliaîsi d'êt' à la séthée dans la mangnifique salle. Et y'avait du vîn dans des vèrres, et du bouais stchulpté, brun foncé, sus les muthâles auve des veues. Et mé dans man jaune tee-corset parmi touos les nièrs fas.

Rêvé l'9/10/2021