Dans la Neuve Rue en Ville, jé pâssais par l'église dé Saint Paul et endrait ch't' églyise-là, j'viyais d'la leunmiéthe dans les vèrrinnes d'eune églyise tchi 'tait tréjous freunmée. La vielle églyise 'tait driéthe les bâtisses et y'avait un p'tit entré0-deux au but d'tchi y'avait eune pétite montée en vielle piTrre et à sénêtre né v'là l'entrée à l'églyise. Y'avait comme eune [narthex] auve tchiques tchaîses en pièrre. Dans l'coprs d'l'églyise y'avait un sèrvice en allant, en j'm'assiévis dans ieune des tchaîses. Y'avait des p'tites rondes tabl'yes étout et ch'tait comme un café, mais né v'là l'sèrvice tchi v'nait à fîn et la congrégâtion à tchitter. Mé' j'entris dans l'corps d'l'églyise tchi 'tais à s'nêtre par eune pétite porte et né v'là d'la bieaté et d'la leunmiéthe.
Lé d'dans d'l'églyise 'tait tout bé, et y'avait des tapiss'sies en rouoge et or, et des peintuthes sus les muthâles mais ché n'tait pon des portraits entchièrs: ch'tait pus à co des buts d'vièr art tch'avaient 'té restaurés mangnifiquement. La vielle êcrituthe en Français 'tait copée chîn' et là.
Un prêtre explyitchait à eune dgaîngues dé p'tites filyes qué ch'tait eune églyise Anglyicanne Francophone. L'églyise avait 'té r'fondée y'a eune bouonne pause auprès d's année quand oulle avait 'té supprînmée. Ouaithe qué l'grand sèrvice eut finni, y'éthait achteu un sèrvice dé bâptême.
Y'avait hardi d'gens qué j'connaîssais et j'fis eune touônnée dans l'églyise en pâlant ès gens auve tchi qué tchiyais becque à barbe, et les décothâtions et stchulptuthes en grannit d'l'églyise 'taient mangifiques.
Mais un seurvillant d'l'églyise, habilyi dans eune robe d'or et portant eune vèrgue d'office, vînt m'dithe qué j'éthais à m'assiéthe viyant qué l'sèrvice d'bâptême 'tait en allant.
Rêvé l'13/4/2022
Viyiz étout: