J'tais dans eune vallée îndustrielle, êtraite auve des falaises bouaîsies des deux bords. Au but d'la vallée i' soulait y'aver un pont en acyi pouor lé tramouais. Mais la lîngne dé tramouais avait 'té freunmée et l'mitan du pont avait 'té dêmoli. Les relles 'taient acouo là ès deux bords et m'naient à des bârriéthes à châque but, et nou pouvait aller à pid avaû les relles jusqu'à la bârriéthe et v'là tchi sèrvait d'pliateformes pouor dgetter ava dans la vallée, où'est qu'i' y'avait des chantchièrs et des bels. Viyant qu'lé mitan du vièr pont n'tait d'aut' là, nou n'pouvait pon aller à pid d'un bord d'la vallée à l'aut' des pliateformes. Nou-s'avait qu'faithe dé crouaîsi par eune sente tchi c'menchait sus la falaise d'eune bord et tchi d'valait rapidement jusqu'au fond d'la vallée, épis y'avait un but tchi crouaîsait la vallée parmi les mannifactuthes et storres atoté sus des bêtchil'yes, quâsiment coumme un pont, épis ch'tait d'amonter rapidement amont la falaise dé l'aut' bord.
Jé d'mandis pouortchi qu'nou n'pouvait pon tout sîmpliément bâti eune crouaîs'sie d'même là-haut entre les deux pliateformes du vièr pont. Ché s'sait bein pus conv'nabl'ye. Mais nou m'mouontrit un mât êlectrique à ieune des entrées au vièr pont. Chu mât ou cheunm'née n'tait d'aut' connexionné à un drannet êlectrique et avait pèrdu san haut. Lé mât 'tait peint l'tou en rîl'yes en rouoge en blianc, et y'avait d's êtînchelles êlectriques tchi v'naient du mât par bordée. V'là tchi dangèl'lait trop les piêtons s'i' y'avait mouoyen d'crouaîsi la vallée à ch't' haûteu-là.
Rêvé l'28/4/2023
Viyiz étout: