Les Pages Jèrriaises

L'Election d'Mardi dern'yi!


 

Philippe Baudains

A Mons. l'Editeu'.

Hourrah!

J'voudrais, messieux, féliciter
Les Electeurs de St.-Hélier
Qu'ont réussi
Mardi dern'yi
A r'mettr' Baudains dans sa grand' tchaise
La oùest qu'il est si bein à s'n'aise.

Dé d'piès longtemps certains factieux
Faisaient d'lus mus pour l'li faize peux
En espézance
(Du mains jé l'pense,)
Qui sé r'tizezai, dé d'dans l'arène
Ov' ses Guitons, L'Couteurs et L'Quesnes!

Mais ch'ès-là 'taient d'bouans viers Jerriais
Comme les D'la Taste et les Godfrays,
Plusieurs Amins
Deux 'treis Aubins,
Les Bissons, L'Feuvre, d'Quetteville et L'Sueue,
L'Hutchet, Les Riches et l's'autres messieux.

Ya deux treis s'maines quand j'ouï pâler
Que deux-treis t'naient à l'opposer,
"Mon doux, j'pensi,
'Las! n'en f'chin ti!
Renvier Baudains dé d'dans l's'Etats!
Tch'est don qu'ils ont; ches drôles de gas?

(Ou s'sez d'accord ov mé j'espèze)
Ch'tait une laie chose qui 'voulaient faize,
Que d'opposer
Coumme un couté
Mait Ph'lip Baudains, parce tchic fais
Il d'sobéis aux Députés!

Faudrait qui f'zait trejous comme yeux,
Qui s'acc'modait à trais meisseux,
Qu'en politique
Et rhétorique
Né sont qu'aviers, quand au contraize
Baudains pas'sait pour lus grand pèze!

Mon doux! mon doux! oùest qu'est l'vier temps
Quand mous aimait les anciennes gens,
Qu'nou l'zécoutait
Avec respect,
Quand l'expérience 'tait appréciée
Et d'bouans services récompensés?

Ch'n'est pas qué j'crai qu'Mousieu Baudains
N'a pas de d'fauts. Puisqu'j'ai les mains,
Et vous les vôtres
Pourtchi qu'les autres
Essaient biaumés par vous ou mé
S'i' n'ont pas chein qui n'peuvent aver?

Puis qu'personne ne peut être parfait,
Pourtchi don n'pas être satisfait
D'un homme comme li,
Qu'a travailli
Dé d'piès longtemps pour vous d'bouan tcheu?
Eche qu'ou pouorrêtes trouvé miyeu?

Yen a qui disent qu'il a une tête...
Eh ben! ch'la prouve qui n'est pas bête.
Et m'est avis
Qué touos les cris
Contre Baudains n'sont pas loyaux
Ni justes innetout, et, ben s'en faut.

Touos chès piailleurs, qui sont si prêts
A l'crititchi, coumêque i f'zaient
A sa plièche, yeux?
Jé sis bein seux
Que les villais n'les r'voudraient guèze
Oprès treis ans. N'pouvous pas m'craize?

J'sis seux qu'une baille es'sait assez
Pour chès messieux, frais arrivés
Dans nos ats,
Et qui n'craient pas
Qué personne peut faize rein comme yeux
(Ch'est-à-dize les DANDY messieux).

L'docteu' Godfray? ch'n'est pas li l'pièze;
Ch'est les gas qui l'poussent dé drièze,
Ch'est là les siens
Qui font l'pus d'train
Qui veulent abattre mais pas r'bâti
Et qui ruineraient not pouor Jerry.

Mais pas tandis qu'dans nos Etats
Jézons d'itèts hommes de travas,
Jerriais d'vieille race,
Et tchi, comme Wace,
Aiment mus s'servi d'une bouanne vieille langue
Qu'en Angliais d'faithe de longues harangues.

Ch'n'est pas seulement pour les villais
Qu'Mousieu Baudains fait tant d'projets,
Mais chest pour nous
Autant qu'pour vous.
Baudains travaille pour tout Jerri...
Jérri s'rêjouis qu'il ait gangni.

Hourrah Baudains! vièr serviteur,
Tu'as bein méthité d's'êlecteurs;
I l'ont prouvé
Mardi passé
En t'noummant pour la septième fais
Connêtab'ye, ov pus d'sept chents vouais.

 

Tant-Mus
Juillet 11, 1902

 

Viyiz étout:

 

Les Pages Jèrriaises