À l'Êditeu de l'Indépendant
Mousieu, - Un vieil homme accâbliè par les infirmités dé l'âge démande du r'pos; en un mot - le Juge Bertram demande sa dêmission, et y nia pas dé doute qué v'la qui lissa accordè, ch'est pourqui y yiéra une pliaiche viède à la Cour et ès Zêtats, et comme sans doute y yiéra bain vite des candidats assez pour le rempliaichi, je f'rai mus d'vos nommé un homme qu'est tout a fait capable dé mettre à sa pliaiche, un qu'a rempli différents postes dans sa pâraisse à la grande satisfaction dé tout lé monde, un homme qui par san courage rêtabli l'ordre pour quique temps dans chutte pliaiche de d'sordre, les Zêtats, mais pour né vos gardé pon pus longtemps en suspense - san nom est Jean Cabot et sa pâraisse la Trinnetai.
J'navais pon entendu rain dé tout chenna sinon Mêcrédi, et nou m'dit qui s'en allaient d'mandé à notre ammin Jean dé s'laîssi nommé candidat à la charge dé Juge. J'essa avec pliaisi que je signenai la d'mande, et j'espère qu'il acceptera l'honneu qu'nou veurre ly faire, mais tréjous nous Trinnetais j'voterons pour ly, et quand lé jour vaindra y puora conté parmi ses voteurs, mé, Mouise du Buolé, un p'tit brave homme, quinne fait ni ma ni tort à personne.
Quand jé m'cuochi Mêcrédi au sé j'pensais d'avé une bouanne niet d'répos, car j'avais tait ès bênis tout le jour, et j'tais lassè comme un puor minsérable, mais ne vla t'y pas que j'étais à peine endormi que j'qmenchi à rêvé, et à vais toutes sortes dé choses dans man rêve, y iavait deux belles dames habillies tout en blianc, et ils taient en compagnie d'un tas d'ptis aviers qu'étaient tuos nus et qui paraissaient avé souffliè tant qu'lus jos en n'taient toutes enfliaies; ils taient toutes entourées d'flieurs, et nou z'entendait le son dé belle musique. Pus en drière je vis un homme qu'avait le pus superbe p'tit bonnet ruoge qu'ou z'aiyis jamais veu, et il y avait ettout une grande robe ruoge sus les êpaules, et en d'sus y yiavait une inscription en grandes lettres d'or, mais tout chain qué j'pu vais de l'inscription était
JEAN CABOT ESSA.....
Et pis j'entendis comme une grande voix qui criyait "Mouise, tu n'en verras pas pus, tu'empliéras lé reste dé l'inscription comme y t'pliéra, êcris vite chain qu'tuas veu, dé peux dé l'oublier."
Jé m'rêvillis, jé saqui d'la veux, et j'allumis le crasset pour m'en allé êcrire comme nou m'lavait dit, mais ne vla ti pas qué notre baloque dé catte s'était cuochie sus le traisième dégret dé haut, et n'la viyant pas, vla ti pas qué j'pille dessus, et j'culbutons avaux les degrès, mé, la catte, et l'crasset, et j'tais tout couert d'huile, et pis ma bouanne femme Betté qui criyait qu'il tait v'nu des voleurs pour m'assassiné, et qui criyait au s'cours à raide é brache; mais j'la r'consoli et j'en fûmes quittes pour la peux, quoique j'fus bain êcuochi. Jê d'sendis à bas pour êcrire man rêve et pour vos l'envyié, car jé cré qui yia quique chose de bain drôle là d'dans, car ch'nest pon souvent qué jé rêvache dé la sorte, mais comme la voix mé dit de finir l'inscription comme je voudrais, j'la finirai par mettre:
JEAN CABOT ESSA JUGE, OU TOUT AU MAINS DÉPUTÈ!!
Jé vait paqr la Gâzette que notre Députè n'eut pas seulement lé cuorage de supporté la proposition dé notre ammin Jean pour le Hâvre dé Rôzé, ch'est pourqui me j'dit: Bravo! Jean Cabot! et à bas l'zempotûmes! Mais n'dites mot, j'nessons pon tréjous embêtès d'itait monde. Mais y raît temps d'sé r'cuochi, ch'est pourqui j'vos présente les compliements d'Betté, et jé reste,
Votre ammin,
MOUISE DU BUOLÉ.
Trinnetai, 17 Avri, 1862
Jersey Independent 19/4/1862
Viyiz étout: