Mort de mes os, le pouore caouan est triste

Mort de mes os, le pouore caouan est triste, mais triste à en pleurer s'il pouvait.

Dans la paraisse iou qu'un biau portrait du rouai a été placé dans le parish hall, il y a tchique temps, vous savez, là iou que les Danois n'ont que faire d'allé tâchi d'acaté des viaux, il y a des braves gens qui sont dans la désolation des désolations.

Pas d'acheteurs pour acater lus viaux. Ceux qu'avaient présenté l'année dernière un affidavit pour engraisser le gros rât de la paraisse et croyaient emplir leurs poches de p'tits jaunets sont fort mârris. Y n'ont encore rien eu pour lus 6/6, sinon que deux ou trais p'tits degouts de gin et d'iau de temps en temps.

Y pensaient pourtant bein que trais gros marchands allaient v'nin lus rendre visite au mais d'octobre. Malheur de malheur, il n'en vint que deux; iun qui connaissait déjà les tricks du trade et qui ferma la porte en fer pour ne pas acater de viaux, et l'autre, John, le seigneur des Ormes, qui fit comme li.

Tous les deux baillirent de grosses cigares et autant de ber que nou voulait en prendre, mais les p'tits jaunes cavaliers de St. George restirent à lus barracks de Broad Street!

Achteu, la grande question pour ceux qui voudraient vendre lus viaux est d'saver s'il y'aura qu'un seul acheteur au mais d'Aout qui vient.

J'vous ai déjà dit qu'un grand seigneur de Vinchelez ne viendra pas, mais j'pense que tout d'même il y en aura pus d'iun. J'ai ouï dire par iun des grands guerriers: J'en mettrons iun rin que pour faire eune élection. y faudrait mieux voter pour une chouque que d'lus laisser faire comme y veulent.

Nou ne sait encore ce qu'il en sera, mais j'vais vous dire ce que j'ai ouï.

Une soirée y avait un party dans une grande et belle maison, j'était muchi au haut d'un vier dresseur.

Tandis que les jeunes étaient à jouer à "Postman's knock" - biau p'tit jeu que celui-là - et d'autres games avec des forfeits, deux viers, la pipe au bé, étaient à d'viser. Ecoutez:

- Vé-tu, depuis que le seigneur a un foreman, v'là qui n'va plus si facilement.

- Nennin, dans le bouan vier temps nou savait iou aver des cavaliers de St. George quand l'on attendait la visite de Moussieu Balleine ou de Moussieu Sohier.

- Ver, mais Jack, li, est wise et y n'ouvre pas souvent la porte de èstablles. Y dit que v'là qui ne paie pas.

- Y a y tout chouna. quand iun des p'tits voulait tourner un becquet d'terre y savait bein qui l'y ferait le plaisir de li aider en prêtant une jument.

* * *

Une autre séthée qu'y faisait bas, j'entendis des pas qui s'en v'naient du côté du bois iou que je m'r'posais.

Yiun d'ieux s'arrêti tchiques minutes auprès iou que j'étais pour satchi eunne allumette. Il était à fouilli dans toutes ses pouchettes quand l'autre l'y dit:

- N'v'là qu'est bein dommage, car Ph'lip était un bouan homme pour notre parti.

- Oui, mais pourtchi l'aver présenté. Ils auraient dû arranger l'affaire. C'est chouna qui l'a fort mârri contre Frank et Ph'lip.

- Ver, et achteu le parti est divisé.

- Voila pourquoi que le laurier n'est pas si touffu d'pis que quelques branches ont été arrachies!