V'là Marie Hibou en hertchin avec les autorités!

V'là Marie Hibou en hertchin avec les autorités!

L'aut'e jour je la trouvi à lièthe bain attentivement une certaine annonce dans la Chronique et en m'approchant d'lyi je li d'mandi, "Tch'est qu'i' y a la d'dans qui t'interêsse si bain, don?"

"Oh!" qu'ou m'raîponni ch'est les Droits Electoraux. Je sis à êtudier l'alinéa 4 car ch'est là l'sien qui m'concerne. ecoutes ch'qu'i' dit.

"Si elle est l'épouse d'un homme qui a le droit de se faire inscrire sur la Liste Electorale"

"Eh bain" j'li dis, "tchest qu'chenna peut t'faithe à té? Absolument tu n't'en vas pas ercliêmer le drouait d'voter!"

"Si fait, v'là justement tch'est que j'men vais faithe. Dieu merci, le temps est v'nu à la fin, qu'les femmes s'en vont aver justice et s'en vont pouver exercer lus drouaits tout comme les hommes. J'avons 'té gardées longtemps assez de d'sous, sapresti! et il est temps qu'j'ayons tchiquechose à dithe dans l'gouvernement du pays. Ch'est comme la couôsine Trachy nos disait l'aut'e sé au meetin'

"Oh! j'li dis," en v'là assez, t'en vas tu te d'menter de monter sus la strade ettou, té, et d'harangi l'public sus des tchestions dans tchi tu n'connais rain?"

"Oui," qu'ou m'raîponni, autchune chose pour une bouanne cause ou dans l'intéthêt public. Sans doute je n'ai pas l'filet si bain coppé comme la couôsine, mais avec un mio d'pratique v'là tchi vaindra. Pour le moment tréjous, ch'qui y a à faithe, ch'est d'obtenir une forme comme il est dit ichin."

Et cache, la v'là aller dans la direction de l'Hôtel-de-Ville.

J'aithais donné autchune chose pour pouver être là ettou mé, car ch'est seux qu'i' y eut du fanne. I' pathaît qu'oulle arrivi là dans un "taxi" et entri dans l'êdifice en s'donnant l's airs d'une duchesse.
"Je veurs une forme." qu'ou dit au prumié plicemainne qu'ou vit.

"Parfaitement Madame," i' li faîponni, "entrez par ichin."

Le sécrétaithe du Connaîtablye était assis à san "desk" et i' n'la r'connu pas tout d'abord car i' n'l'avait jamais vue trimmée comme oulle 'tait chu jour-là. La dernié feis qu'i' la vit oulle 'tait à scrobber l'pas d'porte d'la boutique, avec une pouque à guano à li servi de d'vanté.

"Good morning madam," i' li dit, "what can I do for you"?

Marie lyi, qui n'peut que briochi l'angliais que d'sorte, li raîponni en pliat Jerriais,

"Je sis v'nue pour une forme"

"Tchi sorte d'forme, si' vos pliaît?

"Iune pour ercliâmer le drouait d'voter."

"Ah! j'comprends. Ayiz la bonté d'vos assiéthe, Madame."

Et i' prins sa pliume et un mio d'papi et dit à Marie comme chenna, "Tchi nom, si' vos pliaît?"

"Marie Hibou, femme Caouain."

I' pathu bain surprins, et dit comme chenna, "Oh bon, ch'est vous qu'êtes la femme du Caouain?"

"Vaithe," ou raîponni, "osethiezvous affirmer l'contraithe?"

"Oh, nennin djà! Mais j'espèthe qu'ou m'extchus'sez, je n'vos r'connaissais pas."

Et il ouvri un titheux pour li ramasser une forme mais tout d'un coup i' fronci les sourcis et s'mins à mordre le but d's pliume comme si' v'nait d'li v'nin une idée.

Opprès chenna i' se l'vi brusquement et s'en fu à sa bibliothèque ergarder pour un livre. Il en d'valli iun qu'était tout couvert de ponsi, car évidemment i' n'servait pas touos les jours. I' s'appelait "Ornithological Freaks."

Opprès l'aver fielloté pour une volée, i' le r'mins à sa pliaiche et en prins un autre, "Les oiseaux de Jersey, par Merleblanc."

I' fallait qu'i' trouvisse chein qu'i' cherchait, car i' l'laisse aouvert sus san "desk" et pis i' prins un volume du "Code des Lois" et s'mins à compather des passages de dans les deux livres.

Marie, lyi qui sentait qu'oulle avait à payi pour le "taxi" qu'était à l'attendre dans la route tout chu temps-là, c'menchi à perdre patienche et ou se l'vi tousd'uncoup et êpyi par sus l'desk en disant, "Estche qu'i' faut tant d'compliments pour un malheutheux morcé d'papi?"

Le sécrétaithe li raîponni, "J'ai grand r'gret, ma pouore Missice, mais je n'peux pas vos donner d'forme?"

"Comment? Et pourtchi pas?"

"Eh bain, ou viyiez, l'alinéa 4 dit bain cliaithement, "Si elle est l'épouse d'un homme etc."

"Ah bain par exemple! Faut-i que j'vos apporte man certificat d'mathiage?"

"Inutile, Missice, Je vos r'fusons une forme, car du point d'veue d'la Louai Le Caouain n'est pas une homme

Marie c'menchi à faithe du vacarme dans l'bureau mais l'Sécrétaithe criyi à Phlippe Denis, et li dit, "Phlippe, mets-nous chute créatuthe-là déhors!"

* * *

St. Pierrais. - Si ton gran pèthe était soudard et que ton pèthe aimait mus les frégattins, pour pliaithe ès deux fallait joindre les "marines"

Caouain
27/9/1919