J'y soummes touos les tres a tig-de-corps. Partout ouès qu'y'a opposition, j'avons 'té engagis, et j'vos promets qu'y'a d'la moustréthie. Niét et jour, plyie ou vente, quand bin même i' tchèrait des halbardes le bu pointu en bas, rin n'nos empêch'cha d'être par les c'mins. Nou nos a fourni des livres se Rat; j'avons des listes toutes prépathées; y'en a qué j'prends a man compte; y'en a qu'ch'est Lonôre qu'en souogne, et Laïzé en a sa brachie étout. Comme cheunna, n'y'étha pas un seul élécteur - la iou qu'y'a conteste - qui n'vèrra au mains un membre de la famille. et y'étha bin du ma' si l'sien a tchi qu'j'éthons sufflié tchiq' chose a l'ouothelle né vote pas du bouan bord.
Ch'est Lonôre, a sa toute fine seule, qu'a inventé l'truc qui s'en va faithe gâgnyi touos nos candidats; ch'fut dans un rêve que l'affaithe lius vint; et quand ou nos en pâsli, es dèsjeunnant, j'l'emni avec mé tout d'un co a un "cabstan," j'cachîmes d'un bord et d'l'autre, et quand j'dîmes san plian ès difféthents Coumités, tout l'monde lis sauti au co, et ch'tait a tchi l'embrech'chai sus toutes les jooes!
Et coumme j'vos l'disais, j'avons 'té engagis, touos les trés, pour être sus touos les Coumités la ouès qu'y'a opposition. Tout l'monde s'est mins souôs nos ordres, et nos a promins monts et mèrvelles si l'affaithe reussit. J'avons carteblianche pour touos nos faux-frais, coumme vétuthes, lettres a èscrithe, chocolat et chucrin quand nou passe eunne pétite boutique, et tout l'temps, dans l'armouéthe du comitiroom, d'la galette et du coco pour les femmes, du gin... gerbeer (j'm'en allais quâzi roublié que j'tais tempéthant) par le gallon pour mé.
Pas pour le bin d'un royaume, je n'vos dithais not' sécret. J'en r'pâsl'lons p't'être après l's'éléctions, quand touos - dites que j'vos l'dit - touos nos candidats éthont 'té assérmentés, et que les pérdant s'ont a éxplyitchi a lus femmes ou'ès qu'touos chès sous la sont passés. Mais, n'y'a pas, dès anniét j'sis prèt a gagi que les siens qui s'ont èslus pouôrront dithe: "Ch'est Piteur Pain et ses femmes qu'ont fait d'mé un moussieu." Pour ch'qu'en ést des perdants, les pouôres médjans, j'les pliens; mais ch'n'est pas tout a fait d'lus faute. coumme disait l'President d'un Coumité l'aut' sé, en lis passant eunne modjie d'coco: "Si Lonôre est pour nous, qui sera contre nous?"
Attendez jusqu'ès éléctions! Ous n'allez vèz tchès qu'en s'a. Partout ouès qu'y'a Election, ch'est notr' houmme qui vindra d'dans. J'n'ithai pas jusqu'a vos proumettre que ché s'a tréjous l'miyeu, nan! J'n'ithai pas jusqué là. Mais, bah! ch'est ti pon tréjous a bin près la même chose a la fin du compte? Que ch'sait yun, que ch'sait l'autre, l'pain sa tréjous trop chi pour les siens qui n'ont pon d'sous, tandi qu'les siens qu'en ont acat'tont d'la rente, et les siens qui cliopinnent n'ithont pon a la djèrre.
Piteur Pain
1916
Viyiz étout: