N'vos avais-j'pas bain dit qu'Maît' Jean
'Tait un houm' dé valeu ? . . . .
Quand i-l-agît, ch'est tout-à-bouan :
I môtr' qu'i-l-a du tchoeu.
Oui, nou-z-a veu - bain pus d'eun' fès,
Qu'i n'sé content' pas d'dir',
Mais i-l-agît - i-l-a fait vès ; -
Les motcheurs ont bieau rir'.
Corps-d'âm' n'peut dir' qu'notre anmin Jean
Est yun qu'a frèt ès yèrs ;
Ch'n'est pardingu' pas un ouaisin d'tchan
Qui l'mètra sus ses nèrs !
Pis pus tard qué Sem'di, i-l-a
Dé pus prouvè, d'vant nous,
Qué du jug'ment, dame, i-l-en a
Et pour li èt pour tous.
Il-agangnit à l'Asembliè'
Et là i propôsit
En candidat - d'bouanne ernoumè',
Qué châtchun acceptit.
Ch'n'est pas Maît' Jean qu'alait chouaîsi
S'n-houm' parmi l'z-angliaîchins ;
Des patriot's qu'i faut payi
I les trait' dé souêpins ! . . . .
Les mauvais's langu's ont, chu coup, don,
I'l'espèr', la goul' bain cliôs' ;
Oprès chon'chin, n'vèrront-i pon
Qu' Maît' Jean sait fair' tchiqu' chos' ?
I peuv'nt s'y fié, qu's'i-l-a longu' vie,
Y-éra, bain seux, du meutr' ;
Si ès "Blius Cots" i-l-a envie
Dé donné fi à 'rteurtr' !
Dêjà i vain ès raintchivaill's,
Es traîtr's, l'orgonn' copé.
- Qu'i-l-êprouv'nt, souos la loué martial'
Nos mètr' ! ou nos taxé !
S'i craient coum' chlà nos gouverné,
I-l-atrap'ront du fouèt !
Si j'somm's "trop bêt's pour consulté,"
Nou lus baill'ra du sèt ! . . . .
I n'manqu'ra pas d'Jug's à Jerri,
Lé temps qu' Maît' Jean viv'ra ;
Quand i faudra les dênichi,
Ch'est seux qu'i les trouv'ra.
- Dé not' "couôsin," l'mond' crie dêjà -
Bravo ! Honneu à li !
Quant ès pouôr's "cots," i n'ont pus qu'a
Graté lus sal' fumi !
J.D.R.
St.-Heyé, chu 8 Juin 1868
|
