Ne v'chin chein que iun d'mes anmins - j'en ai tchiques uns - m'a envier par la poste. Bein des feîs merci pour ton d'vis Flippe Grouaîsille.
|
Man chier Caouan, V'la dêja longtemps que j'avais envie de t'êcrithe sus un sujet qui m'interesse biaucoup, mais jusqu'ichin jé n'en ai pas yeu le temps car je veins d'aidji à un fermi de mes vaisins à plianter ses patates, et pis chonna fini, j'avons tai huit ou djais jours à tailli du vrèt. Comme j'ai un moment d'êpaîgne en attendant qu'les patates saient bouannes à grapiner j'ai pensé que j'en profiterais pour t'envier deux mots. ch'est au sujet de chut abômoinable "Projet de Loi" à Mousieu Bouais, qui veur qué nou crève de sai toutes les fais qui ya une êlection. Absolument Moussieu Bouais ne sait pon chein qui fait. Pour tchi qui crait que l's Elections ont 'tait inventées si ch'n'eat pas pour que les candidats paient une fais à béthe à lus anmins. A ty pensé tchel êffet que v'là qui s'en va aver sus l'rât? Dans la pâraisse ouais qu'jé d'meuthe y en a pus d'chinquante qui sont au rât sus l'même pid comme mé, ch'est à dithe que je sommes inscrits pour sièx quartchèrs afin qué j'ayons vouaix dans l's êlections mais v'la tout ch'que j'y connaissons, jamais l'vingtnyi ne veint nos embêter; ch'est les leadeurs de notre parti qui soignent de chonna. Eh bain! Caouan té qui n'est pas justement si bête comme tu pathais, tu comprendras qué ches messieux là ne s'en vont pas continuer à payer le rât pour des ouaisiaux qu'y n'peuvent pas abréver le jour de l'êlection. Y n'est pas besoin d'être docteu pour saver que la vouaix d'un homme se trouve dans sa gorge et nos messieux sachant chonna savent bain ettou que pour que la vouaix se faiche entendre comme y faut, y faut que la gorge sait bain souognie et arrosée avec de tchi bouan assey souvent. Et Moussieu Bouais voudrait mettre un "stop" à tout chonna! Et pis nous, dans par you que j'en s'rons une fais ertranchis du livre de rât? Nou qu'avons tait jusqu'ichin traités avec la pus grande courtouaisie dans l'temps d's êlections, qu'avions tréjous tchiqu'uns des grands d'a pâraisse siez nous et qu'étions portés en cârosse jusqu'au "Parish Hall" et pis condits par le bras jusqu'au "Poll," avec peutêtre un Surveillant d'un côtè et un Protchutheux du Bain Public de l'autre. Je tè d'mande oquo une feis, "you qu'j'en s'rons? Eh' bain, je serons r'gardès justement comme des raindutout, et pis pas pas moyen d'aver seulement une fais à béthe! Oh! Moussieu Bouais, estche qu'ou n'éthèz pas pitchi d'nous? Tu m'créthas si tu veur Caouan, mais j'm'en vais t'dithe comment qu'j'ai 'tai dêjà pinchi par chut maudit Projet là. La semaine passée, quand je r'vénions du vrèt, j'étions p'têtre une vingtaine de vrétcheurs ensemble à faithe nos cherges sus l'haut du slip du Hocq. Quand je fûmes prêts à nos mettre en route, je fus bain content d'en oui yun dithe "Nou baithait bain une fais devant qué d's'en aller." Les autres dirent "Véthe dja." Et cache, nouos v'là tous entrés dans l'auberge. Un châcun qu'mandi chein qui voulit, mais quand y fut tchestion de payer la ronde y qu'menchèrent tous à s'entre ergarder. A la fin not' chantgni dit. "Je paiethais bain pour chennechin garçons, mais la louai ne me l'permet pas cer che s'rai "après" l'êlection. San vaisin dit, "Je sis justement dans la même position v'là tchinze mais que j'fus êlu "Surveillant" chest pourtchi avec toute la bouanne volontai du monde y n'y a pas moyen que j'vos convie. L'aubergiste quemenchi à s'interêssi à la conversait, car y voulait ses sous, li. Toute la crowd avait tchique exchuse, yun ne pouvait pas car ch'tait "avant" l'êlection, et il avait idée de prendre pour Député dans treis ans, un autre se descliathi candidat pour Juge et ainsi d'suite. A la fin y m'avisirent driéthe la porte et s'écriyirent "Ah v'là Flippe! y n'a pas d'poste li et ch'est pas probable qu'il en étha jamais yune! L'aubergiste qui qu'menchait à s'ennier me roûli une pathe d'yiers et m'dit "Come on" et mé j'lis d'mandi "How much please?" et y m'raiponni "Three an' a tanner." "Send your bill to Mr. Bois" j'lis dit. Là dessus y s'mârrit et dit "Don't mention that name in my house." "Pay up! or - Et pour en fini d'pus court, je payi. Crétu qu'chest "fai play" chonna? Je te r'êcrithai peutêtre tchique autre bordaie. A bétôt pour acheteu, Ton anmin, Flippe Grouaîsille. |
Viyiz étout: