Achteu que l'élection pouor Juge est passée

Achteu que l'élection pouor Juge est passée, y faut que j'vos raconte tchique p'tites scènes qui s'passites dans les paraisses.

J'n'veux rein dithe sus chein qui s'passi dans la paraisse de St.Ou, viyant que v'la qui a mêlé les cartes et couomme nos gens sont en êlection pouor Député, j'crais qu'il est mus que j'taise ma becque. Ch'est qu'l'affaithe cauffe raide dans chutte paraisse et y s'en va y avèr du travas de nièt de fait.

Y faut que j'vos dise qu'il y a un p'tit parti qu'nou d'vrait appeler, j'crais, le "rousis" et y pensites de d'mander à Philip John de stander pouor Député. Y lus prites un demi heuthe trop tard, à chein que j'ai ouï, et acheteu nous voudrait bein saver chein qui s'en vont faithe. J'puorrais èttout vos dithe que l'p'tit Fraînque n'est pon content en tout et chunna viyant que la flag à John des Ruette ly fait mâs ès yièrs, mais pouor achteu y faut laissi St.Ou.

* * *

Dans la paraisse iou que l'boss est un vièr soudard qui a été à la djèrre, il y avait un grand homme qui était à canvasser pouor Mess Brée et qui fut quassiment mârri quant ieun d'ses amins s'fit: Eh bein Heber, j'sis bein surprins, ta les couleurs à Mess Bertram. Y n'savait pon que ch'tait les couleurs à chu Moussieu qu'nous ly avait mins!

Par trais fais nous alli cherchi un homme qu'est cacheur en ville et qui avait promins ferme d'voter pouor ieun des candidats. Et chut homme la resti en ville.

Une pouorre femme était restée siex elle, viyant que son buanhomme ly avait dit que ch'n'tait pon une vouaie d'pus ou d'moins qui f'rait grand difference et qu'il fallait mus qu'oulle reste à soigni l'ménage tandis qui s'n'allait au poll. Quand vint un temps, nous l'y téléphoni d'v'nir bé vite viyant qu'l'affaithe était bein divisée et qu'nous n'pouvait pon épargni une vouaie. Nous ly dit que ch'tait l'buanhomme qui avait dit de ly téléphoner. Notre Missis s'déshalla bé vite et oprès avèr voté la v'la qu'oulle vit s'n'homme qui s'fit: Té ichin, mais j'criyais que tu avais dit qu'tu n'sortirais pon.

Tchi qu'avait dit une menterie ou fait une meprinse?

Iun des Connétables d'une paraisse de l'Est voti pouor seur pouor Moussieu Bertram viyant qu'il avait la main rouoge Y faut craithe qu'il n'avait pon d'ribban pouor mettre à sa casaque et que ch'est pouor chunna qui mit tant d'rouoge encre sus ieunne de ses mains!! L'neveu et l'ioncle se trouvites ensemble au poll et couomme il y avait hardi d'voteurs pouor attendre lus tour, l'un s'fit: Pourtchi que tu votes té? Pouor Moussieu Bertram et té? Pouor Moussieu Brée et d'pis que ch'est d'même et que j'sommes touos deux pressi nous f'ra mus d's'n'aller chacun à son travas et n'v'la qui n'changera rein à l'élection. Et chès d'même qui fites.

L'sèr d'l'élection, un grand supporteur d'ieun des candidats s'attachi à ieun qui n'avait pon voter d'san bord. Couomme y s'faisait pourtchi que t'as pon voté d'notre bord et couomme l'autre n'ly disait mot y d'vint for mârri et up n'vla, deux coups d'poing!

Il n'y en eut pon d'pus de douonner car l'autre était l'pus fort viyant que ch'tait.... une pierre de hêche, fouai de Marie Hibou! Et chu pouorre homme resti êtrâslé au pid de chutte hêche, les mains touote écorchies. Comme s'fit l'sien qui l'trouvi: Mon pouorre Mess - dans tchi triste état qu'vos êtes mais pouor seur ch'nest pon la faute à votre Candidat.

Dans une paraisse de l'Est èttouot, un houomme voulait aller en ville pour savèr l'résultat mais sa Missis n'voulait pon qu'il y aille sans ly. N'v'la qui n'faisait pon l'affaithe du buanhomme qui d'vint si mârri que nous alli cherchi l'vintgni pour l'calmer un miot.

J'ai ouï pasler èttout d'un trick que Jack fit pour empêchi sa Missis d'aller au poll viyant qu'oulle n'tait pon du même bord que ly.

Caouain

2/12/1922