V'la don un Juge d'êlu sans qu'i' y ait ieu une êlection

V'la don un Juge d'êlu sans qu'i' y ait ieu une êlection.

Ch'est tchuthieux de vaie combain qu'i y a de bouannes gens qui sont desappointés quand v'là qui s'arrive de même.

Ch'n'est pas qu'ils en ont contre le candidat li-même, bain au liain, mais ils ont dans l'idée qu'un homme ne dev'thait pas gagni chute haute distinction-là sans s'battre pour.

Chute mentalité-là est bain difficile à comprendre surtout quand l'candidat qui s'présente le prumi est un homme parfaitement compétent et bain adapté sus toutes les manièthesm, à remplyi les fonctions qui dépendent de chute cherge-là.

Mais ch'n'est pas là la chose, i' voudraient vais une êlection.

V'la tchi fait du rêvillon dans les pâraisses.

Et ch'est tréjous bain interêssant d'aller canvasser les êlecteurs, louangi votre candidat jusqu'ès cieux et couorre l'autre à bas autant que possiblye.

Iou qu'i' y a rain d'pus pliaisant que ches p'tites rencontres-là des comités deustrais feis la s'maine, entendre les rapports des uns et d's autres, faithe des merques dans des livres d'Rât et baithe des verres cauds à la santé et ès frais du candidat?

Quand i' n'y a pas d'êlection nos bouannes gens ne peuvent pas aver rain de tout chenna.

I' n'y a pas d'fanne!

V'la justement pouortchi qu'i' y a ieu ces jours ilo, tant d'activité dans certains quartchers.

I' fallait absolument trouver un autre candidat.

Mais iou? Ch'tait là la tchestion.

La premié chose que nou fait généralement dans ches cas-là est d'aller trouver le candidat qui fut battu la bordée de d'vant et li offri la job.

Nou li dit comme chenna. Je votîmes contre vous la dernié feis Moussieu, mais chute feis che s'sa pas d'même! Ch'est vot'e tou, et ous êtes seux d'y arriver hands down!

Mais ch'n'est pas tréjous bain aisi de l'persuader.

Un homme qu'a un p'tit mio d'ordgi et d'amourpropre et qu'a offert ses services une feis, raique pour subir une dêfaite, n'est pas tréjous à même de s'laissi faithe le jouet d'la populace.

Et i' n'y a rain d'êtonnant si ch'est qu'il envie ches députations-là lus promener.

Si ch'est là s'n attitude i' n'y a rain à faithe dans chu quartchi-là, et comme i' n'y a pas de temps à perdre, i faut cherchi ailleurs.

Nous en mentionne une douzaine et nou va les visiter iun à iun.

Ches les Connaîtablyes qui sont les prumiers à passer dans l'criblye.

Nou c'menche par les pus viers ou les siens que nou crait qui f'thaient le pus grand nombre de vouaix.

Si n'mordent pas nou va pus liain, parmi les gens r'tithés.

Et v'là justement chein qui s'est arrivé les autres jours.

Opprès aver êpuisé touos les moyens nos messieux s'en furent trouver Maît'e Dan Lêcaudey.

Maît'e Dan avait 'té Inspecteur des c'mins pour djaix ans, collecteur d'aumônes pour une êternité et Protchutheux du Bain Public pour douze ans.

Ch'tait don une rêcompense pour ses longs services de l'y offri la pliaiche de Juge.

Un vier seviteur, et ainsi d'suite.

Maît'e Dan fut bain êtonné de vaie chute djaingue là entrer dans san bel.

D'abord i' s'imagini que ch'tait l'Comité Sanitaithe qui s'en v'nait faithe une visite et i'fut happé d'peux.

Sa maie d'fumi est gentiment près d'la maison et les cottes à couochons sont au ras du c'min public.

Mais i' fut bain vite rasseuthé.

Bonjour Maît'e Dan! se fit le portevouaix d'la députation, je sommes venus d'la part des êlecteurs de l'île en entchi. I' nouos faut un Juge et je sommes venus pour vos d'mander le tout prumi de nouos faithe le pliaisi de vos laissi porter candidat.

Maît'e Dan se trouvi pour un moment un mio êbranlé par une patheille suggestion mais i'r'prins bain vite ses sens et d'mandi tout carrêment.

Etesous v'nus ichin pour vos fichi d'mé?

Nennin, par exemplye! raîponni l'autre, ch'est à vous qu'la pliaiche vaint et les êlecteurs de l'île 'nattentent que vot'e consentement pour se dêcliather en vot'e faveur!

Eh bain i'peuvent attendre, se fit Maît'e Dan, je n'en veurs rain!

Et pourtchi don?

Parce que les êcrituthes nouos disent qu'i' n'faut pas jugi san prochain afin 'dn'être pas jugi sémême, ou tchiquechose à ch't-effet-là.

Bah! bah! Maît'e Dan, chenna n'a autchun rapport au cas actuel! Dites-nous qu'ous êtes candidat et j'nos chergeons du restant. Ous y veindrez avec flying colours!

Mais i' n'purent jamais châtchi l'bouonhomme.

S'aperchevant qui' y en avait deustrais d'entre ieux qu'aimaient bain lus p'tit lermîn, i'lus d'mandi d'entri et lus offri une feis à bèthe.

I' lus fit gouôter d'la litcheu qu'il avait ieu dans sa cave depis quarante ans, et qui n'avait jamais payi d'Impôt.

Nos bouannes gens êprouvithent oquo à l'persuader mais ch'tait inutile.

De là i s'en furent trouver Maît'e Clement d'Caen.

Maît'e Cliem lus d'mandi. Mais pour tchi qu'ou m'prenez? Mé, sus l'banc d'justice!

Eh bain par exemplye ch'en s'sait là une affaithe!

Mais pourtchi pas Maît'e Cliem? Ch'est vous l'homme idéal pour chute poste-là!

Le vier de Caen se mins à rithe, et li ettout lus citi un passage de dans les êcrituthes.

D'une vouaix solennelle i' lus dit, que celui d'entre vous qui est sans péché, jette le premier la pierre!

Tch'est qu'ous entendez par chenna Mess de Caen!

J'entends que Cliément d'Caen n'a pas tréjous té eh bain il a fait comme touos l's autres et Dieu merci il a oquo un mio d'conscienche et i'ne s'sa pas dit qu'il a jugi du monde qui p'têtre, n'étaient pas si coupablyes comme li!

La députation resti comme nou dit bouche béante d'entendre patheille franchise, et i' s'aperchurent bain vite qu'i' n'y avait rain à faithe dans chu quartchi-là. Ch'est pourtchi i' falli cherchi pus liain.

Ils êprouvithent à enjôler un Moussieu qu'était ertithé opprès aver fait sa fortune à la Côte, un vier forgeux qui vivait d'ses rentes, un mâchignon, et un ancien marchand d'chiques qu'avait l'moyen d'subi les frais d'une démiedouzaine d'êlections sans s'en aperchevé.

Mais partout avec le même rêsultat.

Personne n'en voulait.

Et comme des tchans fouôtés ils abandonnithent la partie tout-à fait dêgouotés de vaie que le vier esprit du temps passé avait totalement dispathu.

Et comme i' s'entrent disaient en rentrant siez ieux.

L'Ile de Jerri s'en va ès tchans!

Caouain
Les Chroniques de Jersey 22/1/1927