Y fallait y allé oprès l'thê,
Pour se faithe seux de pouvé les vê ;
Il' tait tard, j'avais yieu à disquté,
Tout l'bein qu'avait fait l'vier Député.

Arrivai ès-Croix, y faisait bas,
N'oun viait pon la main d'vant sé,
J'm'arrête, j'êcoute, j'entends des pas
Qui s'env'naient vite du côté d'mé.

Vite, j'saute dans la foss' à caux,
J'en avais jusqu'à la qu'vil' du pi ;
Y s'en v'naient vite, y pâlaient haut,
(Me v'la à quat' pattes dans l'mortchi).

Y v'naient du Sud, y s'arrêtent
Drait dans l'mitan d'la rue endrait mé ;
Ch'tai assès pour m'tuôuné la tête,
J'tais bein obligi d'les êcouté.

Y 'taient deux : y'avait Ph'lip du Par',
L'autre, ch'tait Ph'lip de la Port' - car
De Parkfield y v'naient de soupé ;
Il' avaient les deux la pip' au bé.

A la lueur, je vi qu'la chanson
N'êtait pon la même, qu'les choses
Avaient tout a fait changi de ton,
Car je les êcouti un' pôse.

Je vins trempai, tout muoilli de sueu,
J'avais peux par hieux d'être veu,
Car y pâlaient d'mê, pas à bein,
Allais, je n'vos en ditheai pon rein.

Et tout l'temps, je pâumais d'rithe
Pus d'un' fais, je vis le moment,
Car pour de mé, y faut tout dithe,
J'tais dans un terrible tourment.

Après, y se minrent à marchi,
Allant du côtai du Vert Pignon :
J'en 'tais, ma fé, tout autr' que mâri,
J'tais dans un' drôle de position.

J'santi dans la rue, j'narrêtit pon,
Avant d'arrivé à ma maison,
Et pis j'raconti tout a ma femm'
Hou riait, hon prenait tout en faun',

J'li montri m'n'êta, tuous mes habits,
Mes hardes étaient toutes salies,
Partout j'navais que de la saltai,
D'un but à l'autre j'en 'tais duotheai,

Je tais lâssai, je fus me quochi,
J'eus de la peine à m'endormi,
Ma femm' hou criait d'un ton narcouais,
Allais, Penfaicq, cherchi de chais voies.

Dans l'mitan d'la gnait hou l'êprouvi
Sus tuous les sens, à m'rêvilli ;
Pas si bête, car je l'entendais,
Hou criait tout haut : cherchi des voies!

N.B. - La buonne femme, "Sotte voce" " dit à lyï même.
"Y vaudrait si bein avé"
"Un morcé d'boies oprês d'sé."

A. M.