Maît'e Ph'lippe Pinciaux et san vaisin Bernabé Trimousse étaient à distchuter l' êlection générale pour les Députés d'l'île.
Et comme i' s' arrive souvent quand deux hommes se mettent à pâler d'politique et n'sont pas d'la même opinion, i' faîllithent aver du brit.
Maît'e Ph'lippe li, partageait les mêmes sentîments qu'il avait veu exprimés dans toutes les gâzettes de Jêrri quant au manque de nouviaux candidats pour la poste de Député et il 'tait convaintchu que toute ch'tte apathie-là et le fait qu'i' n's'en allait pas y aver une seule êlection contestée était une preuve certaine que tout s'en allait en dêcadence et que l'île s'en allait ès tchans.
Bernabé li dit que ch'tait tout l'contraithe.
Quant à li, v'là tchi prouvait qu'à forche d'aver ieu d's êlections périodiques dans l'temps qu'est passé touos les miyeurs hommes avaient 'té chouaîsis, ch'est-à-dithe que toute la créme avait monté au haut du pot, et comnme ils avaient tous fait preuve de lus capacité, nou dev'thait s'féliciter que la majorité d'ieux étaient oquo prêts à servi lus pays comme par le passé et nou dev'thait lus donner tout l'encouothagement pôssiblye et lus être bain erconnaissants qu'i' voulissent bain continuer à nos représenter.
Les siens qu'étaient tréjous à agîter pour des êlections n'étaient qu'des cherche-sensation et d's imbéciles, des gens qu'étaient tréjous au "look-out" pour aver à baithe ès frais d'autrui.
Maît'e Ph'lippe la d'sus prins l'paîvre au nez car i' considethait une patheille dêcliathation comme une insulte personnnelle, et i' dit comme chenna à Bernabé, "Selon vous don, Bernabé Trimousse un principa d'pâraisse de man calibre et d'ma position ne peut pas s'otchuper d'la politique sans être traité d'ivrouogne?"
"Ah!" s'fit l'autre, "chute ermerque-là ne s'applique pas à vous, par exemplye, j'étais à pâler d'une manièthe générale."
Mais l'bouonhomme Pinciaux s'était trouvé frouaîssi et i' r'vint tout-d'suite à l'attaque.
"Tch'est qu'ils ont fait vos célèbres députés, toutes ches années ilo? Ils ont laissi gaspillyi les sous du public! Ont aidji à les fiiantchi dans l'fond d'la cauchie! I'lus sont accordés à êrigi une espèce d'âsile qu'aitha couôté appréchant d'chent mille louis dévant qu'ou ne sait finie! Ils ont aidgi à appointer un micologiste à des salaithes exhorbitants! Et pourtchi faithe? Passer san temps dans une serre caude à jouer avec des microscopes et des chanmpignons!"
"Ah! Maît'e Ph'lippe, arrêtez un mio!" s'écriyi Bernabé, "ne bliâmez pas les Députés pour chute job-là, pas les siens d'campagne tréjous! J'étais à la séance des Etats mé et je r'mertchi comment qu'i votirent. Si ch'est qu'ou prenez la peine d'êtudier l'analyse du vote, ou verrez que - "
Mais Pinciaux ne prétendait pas être interrompu dans sa harangue et i' continui.
"Et d'penser qu'i' lus prêtaient à des distchussions sus la restriction de l'exportation de lêzardes et d'crocodiles!
Et pis ch'n'est oquo pas là tout!
V'là des pamphêques qu'aidgithent à passer une louai pour la protection de quâsi touos les ouaisiaux qui nos sont nuisiblyes. V'là deux ans que touos les bancs d'êpines par siez-nous sont remplyis d'nids d'mêles!
Ou vos en fichiz vous car ou n'êtes pas capablye de craître aut'e chose que des patates et des tomates! Mais j'sis ordgilleux d'man gardin, mé, et dans l'êté je n'peux pas rêserver mes frambouaises ni mes "logans." Ni je n'peux pas joui d'man bétchèt d'frâses à cause de ches maudits ouaisiaux-là!
I'sont pus êpais qu'des mouaissons, sapresti!
Si ch'est que j'pouvais plianter une demié douzaine de vos députés dans man gardin à servi d'êpeûthas, che s'sait oquo qu'amié ma. Vaithe, je vos l'répète, si j'en avais l'pouvé, je cliergithais tout chenna comme avec un genêt et j'aithais une êlection dans toutes les pâraisses et dans touos les districts d'la ville ettou! Ch'est là le seul moyen d'aver une législation saine!"
"Eh bain Dieu merci, Maît'e Ph'lippe, ch'ne s'sa pas oquo pour chute feis tréjous!
Et pis quand-mème, les modèles de perfection qu' ou mettrethiez en avant ne vaudraient pas une mie mus que les siens qu'y sont."
"I'n'pouorraient pas être fort pièthe, tréjous!" riposti l'bouonhomme.
I'furent à s'entre hertchini pour pus d'une démieuthe et, comme est tréjous l'cas dans d'patheilles occasions, i' n'en 'taient pas pus d'l'avant quand i' furent finis.
La position en reste la même.
Viyiz étout: