Ki ri-ki-ki
Ka-ra-ka-ka
Au mais d'décembre il est pour y'aver d's êlections. Les députés des difféthentes pâraisses daivent èrprendre pour un autre terme ou tchitter le poste tout à fait et être rempliaichis par d'autres. Etou, y'a la possibilité qué d'autres candidats lus mettent sus les rangs et qu'y'ait eune batâle 'chîn et là. Chennechin s'arrive touos les trais ans. Sachant ch'la lé Chef mé donait l's ordres y'a tchiques sémaines dé faithe eune touonnée compliète, dé mettre deux et deux ensemblye et d'en faithe eune bouonne articlye pour san papi, en m'pèrmettant d'l'extra sus mes gages ordinnaithes.
La touonnée ma otchupé pour bein dithe une tchînzaine dé jours et i' m'a r'fallu eune autre sémaine à dqmêler mes notes et êcrithe man rapport.
Y'a tchique temps lé Pigeon du Vèrt Papi (un affronté, s'i' y'en a iun) fit la même chose, mais au lieu d'êcouter, ch't'ouaisé chîn eut d's entréveues auve plusieurs gens tchi li'en contîtent dé pus d'eune sorte, sachant tch'il 'tait souotre des nouvelles. Mé, jé n'mé fie pon trop sus pèrsonne quand ch'est pour d;s affaithes d'licates comme chettechîn. J'ai procédé tout à fait d'eune difféthente maniéthe - j'ai êcouté, tchiquefais dans les bouais, ou ès pingnons, et même ès portes et ès f'nêtres.
Preumiéthement j'fit la pâraisse dé St. Cliément (étant tout chu temps à d'meuther en d'ssus d'Vèrcliut). Ch'est eune drôle dé pâraisse. Les dégrets sont gardés comme si ch'tait à la banque à Moussieu Desrieaux. Tout ch'qué j'put attraper ch'tait qu si ch'est qué l'Sieur Bliampid allait tchitter i' s'sait rempliaichi par un mâsuthi, mais pour dithe si ch'est l'bouonhomme dé Jambart qué nousentend ou bein l'chein d'la Blianche Pièrre j'n'ai pon peu saver. si vos pliaît faithe des entchêtes vousmême j'n'ai autchun doute qu'ou dêcouvréthez tout d'suite.
Ayant prîns des raffraîchissement siez Miss Lé Vesconte lé jour 'tait compliet. Lé lendemain ch'tait Grouville. Ichîn, la même chose. Pas moyen d'en faithe un bouon français. Mais les reumeurs sont qué l'Sieut Touzel Brée s'èrtithe et qu'i' s'en va y mettre san fis. comme i' dit, "is yong blud, we wants." I s'adonnit qu'j'l'attrapit à pâler à un angliais d'par-là. Extchusezmé si j'ait fait eune erreur pus haut. Ma connaissance d'la langue angliaiche est limmitée. Et dévrai, ch'est un piêssant livron qué Mess Brée junieur, et un bieau matîn! I' f'sait un raide bouon député. N'y' éthait pon d'opposition car il est hardi populaithe. Y'en a tchi voudraient y vaie Charles L'Hutchet et d'autres acouo l'Sieur Lé Couoillard.
La préchaine ch'tait St. Sauveux, ou comme nou l'prononce ila - St. Saouveux. Moussieu Mouothant en a ieu assez. Il' ont tous grand r'gret dé l'pèrdre mais j'pense qu'il a fait s'n idée. tch'est qui l'rempliaich'cha? Ch'n'est pas facile à rêpondre. Y'a l'Douard Lé Gresley, tch'est êcrivain, mais j'pense qué sa femme né veurt pon. Et pis nou pâle de chein d'la Rue à la Dame, mais nou n'mentionne pas d'noms. Y'a étou un Pallot, mais du dgiâtre si j'ai peu saver l'tché qu'ch'est. J'en fais qué ch's'sait p'têtre Emile, un homme bein dêhalé et auve tout pliein dé p'tits boudîns dans la tête. Nou vèrra.
En ville - mais jé sai bein qué vous, campangnards, n'êtes pon fort întérêssis des députés villais et ch'est ch'tchi fait qué j' n'y restit pon pus longtemps qu'i' n'fallait. I' faut tout d'même vos en donner tchique idée, à seul fîn qué l'chef aie la satisfaction d'saver qu'j'ai fait man travas comme i' faut.
Eh bein, lé députée l'Mâsuthi et san parchongni (jé n'sai pon comme tchi qu'i' nom, mais ch'est un angliais) èrprennent pour eune autre gestion, et, mèrvelle dé mèrvelles, Missis Trachy s'en va y r'êsprouver! Bouonne chance, bouonnefemme, bouonne chance. Oulle y veindra chutte fais, ou vèrrez. Lé Douard Lé Tchêne et l'Sieur Belford sont seux d'y r'être mîns car n'y'a pèrsonne capablyes autrément dans chu district-là! Quand es deux autres, Jean Hueûlîn et Ph'lippe Richardson, il' éthont à lus battre contre lé Sieur Ernon. Il est dit qu'chu dreinnommé pèrdra. Là Jean Anmin voudrait bein y'être, et y'en a tchi disent tch'i' s'en va s'porter candidat étou pour iun des districts d'la ville.
Jé n'peux pas vos en dithe pus chutte sémaine. J'ai à bein près emplyi l'espace qué j'sis alloué, quand j'mé sis pliaint au Chef qu'les colonnes dé san bouistre d'papi né sont pas assez longues et qu'n'y'a jaimais trop d'run pour mé i' m'a achîtré et m'a d'mandé si ch'est qué j'crai qu'i' s'en va grandi la gazette pour l'amour dé mé et tout man niolin. I' n'est pon d'bouonne heumeur tout chu temps et dans l'moment actuel il 'tait dans un guédon contre tchitchun (du pèrsonnel j'pense) et voulait offuche porter s'n accès d'coléthe envèrs mé. Je li' ai rêponnu qué si' en tout cas j'pouorrais rompre ma connexion auve la Chronique pour né lî causer pus d'embarras. "Né prend pon l'pêvre au nez d'la maniéthe, Marie," i' s'fait, et en m'fliattant (pas à r'bours pé, par exemplye) un mio et m'pâlant tout doux lé calme règne eune autre fais et tout est mangnifique. Pas un mauvais vièr gas, qué l'Chef!
10/11/1934
A St. Louothains i' y'étha êlection. Les candidats sont c'menchis à chèrchi des vouaix. Eune séthée tout dreinment j'vit l'Jean L'Mèrquand tchi ramontait l'Mont des Pèrrinnes, marchant bouon pas, la tête en bas et les mains driéthe li.
Ouêqu'i' s'n'allait à d'itelles heuthes, ou voudrez saver. La rêponse est - cherchi des vouaix, cèrtainment.
Lé député d'acheteu n'tchitte pon pour pèrsonne, ch'est pourtchi - y'étha eune batâle. Santé, Mèrquand! Bouonne chance, Pipon!
St. Brélade. M'n'anmîn, Moussieu Orange, en a ieu assez.
J'pense qué Georges L'Rossingno, Jean Fiellâtre et Douard Lé Bro sont sus les rangs, mais j'n'sai pas pus.
St. Pièrre. Tchi drôle de pâraisse!
Câsiment tout l'monde pâlent en angliais et i' m'fallut plusieurs jours à êcouter attentivement. Les deux'trais patholes dé jèrriais qu'j'attrapit m'donnaient à comprendre qué n'y'a pas d'changement. Il' ont un bouon homme et i' l'savent bein. les St. Pièrrais n'sont pas achocres quand même tch'il' aient gentiment d'ordgi.
A St. Ouain (ou St. Ou, comme nou disait aut'fais) nousy pâle acouo bein pliat. Mais ch'n'est pas là la tchestion.
Eh bein, l'Frainque Lé Feuvre n'est pon enn'yé d'être lé député d'ses pârouaissiens. D'ailleurs, ch'est un homme tchi sait quand tchi pâler et quand tchi s'taithe dans la Chambre d's Etats. I' n'bagoule pon comme à bouon et il a du paids dans ses manches. Tch'est qu'i' faut d'pus? Un bouon gas. I' y'est pour sa vie.
Quand j'vint à Ste. Mathie j'réalisit bein vite qué la p'tite pâraisse n'était dame pon la pus aisie à parcouothi. Les bouais sont bein êcarces et j'trouvais d'la peine à mettre "pied à tèrre." J'en ouit d'pus d'eune sorte, étou, mais j'vînt bein vite à la conclusion qu'el y'a eune dgaingue dé menteurs. Jé crai qué l'Nic Pèrrée èrsétha êlu pour un autre trais ans, mais s'il allait tchitter i n'manque pon d'candidats - Charles Bisson est tréjous là, Ph'lippe Lé Feuvre, Douard Lé Cornu et Charles L'Bro, n'sont pas yain.
A St. Jean - eune grand' êlection. L'Jacques Guèrtrel (ch'est d'même qu'nou l'êpèle en jèrriais) a touos ses supporteurs d'habitude, mais l'Jean L'Brun veurt un mio d'fanne. Ch'n'est pon manque d'amiêtchi entre les deux, mais lé Jean trouve qué l'jèrriais, lé langage dé nos anchêtres, est absolument négligi au jour d'aniet dans l's Etats, et il a envie d'lus en dithe tchiques patholes au pus vite. I' f'sa bein. Il est grand temps qué nou rappel'la à touos ches membres-là d'la ville, les mêssiotins, qué nou pâle acouo l'jèrriais en Jèrri.
Tch'est qu'en est d'la Trinneté? ch'est un Cabot tchi y'est et ch'est un Cabot tch'y s'sa. Quand ch'tîchîn abandon'na l'honneu d'la poste y'étha d'autres Cabots à l'rempliaichi. j'ai oui, dgia, lé Frainque Lé Mèrquand faithe du fliannet eune fais ou deux à ches drein et i' pathaît craithe qué un changement né f'sait pon d'ma. Comme touos bouons St. Pièrrais il aime bein d'la variêté. Mais, pour acheteu ch'est - vive Cabot!
La dreine pâraisse dé ma touonnée 'tait St. Martîn. ch'est Charles Billot tchi y'est député. La dreine bordée (ou la 'vant-dreine) i' baillit eune bouonne ronde à s'n opposant et il est tout probablye tch'il en f'sait tout autant chutte fais si autchun autre osait s'mâter d'vant li. A St. Martîn lé nom Billot est bein assez. Mais, s'il allait r'fuser d'èrprendre pour eune autre gestion, comme ailleurs n'y'a pon d'disette dé candidats. Les noms Journieaux, Mallet, Pallot et Dorey (Faldout) saute ès yeux tout d'un co. ches braves gens lus vèrront dans l's Etats tchique jour, mais y'a acouo du temps.
Né v'là, mes anmîns lecteurs toute l'înformation tch'i' m'est possiblye dé vos donner pour lé moment au sujet d's êlections pour député contre Noë. Mais, si ch'est qu'ou voulez un mio d'rêvillon j'vos avis'sait d'aller tout spécialement à St. Jean ou St. Louothains. Ch'est là qu'lé fanne sé don'na et nou vos y bâl'la bein seux un gouttîn d'fromy ou un nodgîn d'cognac. J'y s'sai mémême, sans manque.
17/11/1934
Marie la Pie
Viyiz étout: