|
J'avons don yeu l'autre semaine, En Jerri un bain grand procès, Qu'a fait Mousieu Jean Saliveine Au réprésentant des Trinntais. Voulant bain célébré la fête De sa celêbre élection, Maîte Jean Dangnié se mins en tête De faize écrize une chanson. Y savait si bain que, l'afêze Un coup finie, chacun voudrait Gravé profond dans sa mémouêze Les grands haut faits de la Trinntait; Et y se dit un jour, je juze Qui yen a des suais d'entre yeux Qui fezont hallé ma pictuze Pour la pendre dans lue parleux. Sa femme ségoufit à rize, Et dit en vla du bargouêchîn; Car commêche qu'ou pouvais dize A votre âge ditait gniolin; Allais trouvé Mess Saliveine, Et demandais li si li pliais, Li qui fait tout chonna sans peine, De vos écrize des versets. Nou les mettra dans la Chronique, Nou s'en va les chanté partout, Sue l'air de quique vier cantique Ou bain d'une chanson d'avout. Nou les diza dans toute l'Ile, Depie la Roque à l'Etaxé, Dans la campagne, dans la ville Et de la Corbièze à Rozé. Maîte Jean li dit: "Ah qui varvette!" Mais tout dmême y prins se navis, Pie y montit dans sa quezette, Vite en avant et cache gris. Maîte Jean vint et trouvi sen homme; En deux mots tout fut arrangi; Nou ne pâli d'aucune somme, Et nou ne fit aucun marchi. En vier Trinntais qui sait bain vivre Maître Jean li dit: venais nos vais; Ou pourrais là écrize un livre; J'avons bain souvent du pain frais. Ne vechin la saison des pommes; J'ézons bétôt du cidre doux; Savous bain que tait que je sommes, Nou se traite assais bain siès nous. Après l'invitation faite, Mousieu Saliveine accepti Et tout fut comme sue rouolette De fin d'Octobre à mié Janvi. Dès qui pazut dans la paraisse, Nou le fêtit, mais ès Camps-Raux, Chetait ligouêsie et caresse, Nou li faisait mille biaux-biaux. Pie trais jours au mains par semaine, Y venait-là se rigalé; Comme y semplissait la bedaine, Y fallait le vais de stofé. Quand y sasiévait pour en prendre, Y mangeait comme un vrai pourpais, Et pie pour le fèze descendre, Y bévait comme un Polonais. Un jour quand y se lvit de table, Missis Cabot dit qu'il avait Un ventre comme un Connétable Et que pardingue y marchait drait. Ou dit pourvu que chonna duze, Si continue a bain mangi, Y veindra ma fé je le juze Pue gros que n'est Mousieu Dâvi. Un sé nou li fit des merveilles; Car y n'avaient que de vier pain Y dit ne vlà de sans pazeilles; Mais chès que diâtre y mangi bain; Y n'en laissi pus une miette; Fallait vais comme y les baufri. Hélas! comme y cliergi l'assiette! Nou disait: y s'en va rgoli. Et pie chetait la compagnie Qu'il amnait, un tas de villais, Une tapais d'Agliaichinnie, Qui ne pâlais pas le jerriais. Mais comme y faisaient joué lue goules En bargouêchant lue brutalien, Y caquetaient comme des poules Mais gaufraient des tourtes de pain. Un jour nou lue donni des zîtres, Pie nou fricachit du paisson, Mais la racachie de gommitres Les avalirent sans raison. Y zen supaient deux par bouochie, Sans s'occupé de la chiertait. Même au temps de Missis Pallie, Un jerriais neut pas tait ditait. Y vint un jour pour quiqu'afèze Et il était dans le prainseu, Quan tout d'un coup nou loui brèze, Car y chantait comme un lecteu. Ou chantais comme une sézaine, Fit un Mousieu qui l'entendait. Je vos en prie Mess Saliveine, Venais demeuze a la Trinntait. Notre Eglise que le ministre Fait tout chan qui peut pour rempli, Reste viède. Hélas! que chès tristre; La faute en est a nou nsait qui. Depie lon-temps nou s'imagine Que si j'avions de bouons chanteurs, Sutout des gens de bouonne mine Que j'ézions un tas d'êcouteurs. Les jours filaient comme une balle, Nou se prépazait pour Mardi, Nou zeu de bouon beu de la halle A Tom De Faye; et Jean Bliampi Fournit le lard, chest assais dize Que nou zetait seux de se vais, Car chest pour mangi et pour rize Que vote deux ou trais Trinntais. L'Anmin Flippe 1872 |
Viyiz étout: