N'v'la donc les élections terminées

N'v'la donc les élections terminées et de touos les d'vis d'opposition ch'n'est que dans la paraisse au Captaine qui n'a jamais été en mé, qu'il ieut du feu de satchi. En encouore un failli feu qui n'aurait pon prins en tout si l'chantgni avait dit tchiques jours de d'vant qu'il tait prêt à accepter la poste.

Mais j'sais bein que si dans la paraisse à mon biau cliochi il n'y ieut pon d'élection, histouèthe d'aver une bordée d'fun, car nous savait bein qu'nous n'pouvait boulers hors l'sien qui y est, s'il n'y eut pon d'élection, n'v'la qui n'est pon d'la faute au sien qui espèthe bein être un jour chantgni. Mais éttout, n'v'la qui n'est pon tréjous aisi d'aver d'jais volunteers pouor jouer une farche de même et quand nous n'en a que la maintchi force est rester trantchille.

Ch'est que viyous dans une bordée d'même ch'n'est pon couomme dans chu meeting iou qu'nou comti sièz bulletins de plus de votes que de gens présent!!

* * *

Y faut que j'vos raconte une p'tite scène qui s'passi l'autre jour dans une paraisse iou qu'nous à canvasser touos les siens ayant droit de vote.

Dans chutte paraisse, une Dame était horte en Anglieterre en holiday et l'sien qu'avait la job de canvasser dans son district fut deux ou trais fais pouor saver si oulle était de r'tour.

L'autre jour ayant eu vent que chutte Dame était de r'tour, notre homme s'empressi s'quitter son travas et couomme y versait d'plyie, y happi son parapluie pouor s'en aller passer l'compliment à chutte Dame et l'y d'mander de recorder son vote pouor son candidat.

Oprès que la servante y ieut ouvert la porte, notre homme entri avec son parapluie sous l'bras.

Quant la Dame s'présentit, notre homme voulit ly faithe l'compliement mais faut craithe qu'il tait un miot nerveux et qui s'mit à aheuqueter car d'vant qu'il esut fini, la Dame ly réponnit en anglais "No, we have no umbrellas to mend!"

Notre homme en resti touot ébahi n'comprenant mot mais d'vant qui peut expliquer l'affaithe, la Dame était horte et l'avait laissi à son touot seu!

L'pus bé de l'histouèthe ch'est chein qui s'passi lar'levée à chein que j'ai oui.

Un grand Moussieu de chutte paraisse s'présenti à son touor chez chutte Dame et couomme y s'extchusait du fait que son parapluie était cassé, la Dame l'y fit la r'merque What a pity. If I had known that I would have sent you a man that called this morning to see if I had any umbrellas to mend!!

Tchès eu'en pense Philip de touote chutte histouèthe? et ch'n'est pas du gniollin, fouai de Marie Hibou.

* * *

Chunna s'passi il y tchiques s'maines, dans une paraisse d'amont à une vendue.

Quand l'encanteur ieut adjugi une g'nisse, la Missis alla crier à s'n'homme qu'il n'fallait pas laissi aller les bêtes a aussi buan marchi et qui fallait d'mander à l'encanteur de la r'mettre en vente.

Bé seur, ieut un miot d'fun parmi les siens qu'étaient à la vendue d'pis que n'v'la qui ercouomenchi à l'entouor d'une autre bête quand la Missis s'fit: Je n'voudrais pon que chut homme l'aurait.

Acheteu nous voudrait savèr tchès que sont les rules dans une vendue d'même, car il y en a qui sont d'avis que d'vant d'adjugi des bêtes ou des lots l'encanteur d'vrait compter yieunne! deux! trais!

Sais tu Mary, que j'sis quassiment de chut avis touote bête que j'sis.

* * *

Encouore bein qu'il n'y ieut pon, oprès touote d'élection dans la pus p'tite paraisse en Jerru car nos candidats étaient bein enbarrassis viyant que Percy n'aurait pus lus prêter son parleux d'pis qu'il avait arrangi une partie de danse pouor un crew de villais au sé même du jouor de l'élection.

Achteu Charles s'en va avèr hardi de travas pouour tchique temps car viyant qu'il est faiseur d'enterrements et qu'il n'y a pas d'autres entrepreneurs de ce genre dans les Etats, j'pense bein que ch'est ly qu'aura la job d'enterrer touos les projets de louai logis au greffe pouor n'pus en sortir!

Et ch'est qu'il y en a qui attendent un enterrement de prumièthe classe, s'il vos plait!

Mais dans chutte paraisse j'comprends qui s'en va y avèr élection pouor chantgni et j'espèthe bein que chutte fais Percy n's'ra pon si empressi à louer son parleux ès villais et qui pensera ès siens de sa paraisse car autrement l'affaithe n'irait pus en touos et il y en aurait hardi d'marris quant à ly.

* * *

Dans une autre paraisse, la mé bouillonne de dessous au sujet de hot stuff qu'à été acaté en ville et qui rend for mârri Charlie, viyant que ch'n'est pon ly qui donni l'ordre.

N'te marrie pon mon Charlie car tu n'y gagnerais rein, fouai de Marie Hibou.

Caouain

12/12/1925