Moussieu le Connétablye de St.Martin a réussi à faithe adopter san projet de Louai permettant ès Inspecteurs des C'mins de siégi et d'voter dans l's'Assembliées des Principaux d'Pâraisse, et i' pathaît que v'là tchi n'a pas pliu à bain des campagnards, surtout tchiqu'uns des viers qui sont si conservateurs qu'i' n'aiment pas à vaie des cangements continuels dans les anciennes louais du pays.
Parmi cheux-chin iun des pus malcontents est vot'e vier amin Maît'e Dan Lêcaudey qui vint l'aut's jour au bureau nos donner s'n opinion sus l'amendement qui fut remporté dernièthement au sujet d's Inspecteurs.
Il avait à la main une copie d'la Louai sus les C'mîns et il 'tait pus excité que je n'l'eussions jamais veu.
"Nos Messieux dans l's Etats vainnent oquo de faithe des bêtises!" qu'i' nos dit: "I' f'thaient bain mus de rester siez ieux que d's'en aller d'même, souos l'prétexte d'mender les louais, trébutchi tout l'bouan travas que lus prédécesseurs avaient fait d'vant ieux!"
Le Chef li d'mandi "Tch'est qu'i' y a don Maît'e Dan? Iou qu'la môque pique chute feis?"
I' y a que l's Inspecteurs ont drouait ès Assembliées des Principaux, gâsdemmin! I'n'aithait pas 'té necessaithe de chenna i' y a tchiques années, car nous y mettait tréjous d's hommes qu'étaient dêjà des Principaux, ch'estàdithe que nous observait la Louai. Ecoutez don que j'vos liaise l'Articlye 3!
Et opprès aver mins ses lunettes le bouonhomme se mins à liaithe.
Article 3
Il y aura deux Inspecteurs du travail des chemins pour chaque Vingtaine d'entre les plus notables habitants de chaque paroisse, sans égard aux Vingtaines, dont le devoir, etc.
Là don! choisis d'entre les plus NOTABLES habitants. Tch'est que v'là tchi veur dithe, chenna? Allous m'dithe qu'un homme peut être un "notable habitant" si ch'est qu'i' n'est pas dêjà principa? Si nous avait continué à observer l'Article 3 i' n'y aithait ieu autchune raison d'être pour l'Amendement au Connaîtable de St.Martin. Mais v'là che que ch'est! Acheteu dans bain des pâraisses nous y nomme n'importe tchi, des frais pondus qui n'connaissent pas la difféthence entre du bouan gravi et du robbidge, des mousses qu'ont oquo les talons jaunes et qui n'ont pas assez d'jugement pour vaie qu'les gens chergent comme i' faut quand i' sont à faithe lus c'mins!
Et tout chenna s'en va acheteu aver l'drouait de v'nin voter dans l's Assembliées parmi des Principaux d'man calibre! Ch'est un scandale, sapresti!
Et pis, jusque iou que chenna nos mèn'na?
Des gens sans principe, qui voudront renforchi lus parti, lus gardethont bain, quand i'y aitha une vacance pour Inspecteur, d'y mettre du monde qu'ont déjà droauit à l'assembliée, mais îthont ramasser tchique O en chiffre avec autchune connaissance de rain pour remplyi un poste que la Louai dit bain distinctement es'sa remplyie par un habitant Notable!
J'en avons déjà la preuve par sieznous.
Les Inspecteurs s'en vont fini lus gestion à la Saint Miché et l'vier Cliément d'Caen est dejà à canvasser la paraisse pour un neveu à li qui vaint de r'venin du Canada ouest qu'il 'tait clerk sus un run de tchique carre à Paspédja. V'là un ouaisé qui n'a jamais veu une carriéthe dans sa vie et nou s'en va l'mettre Inspecteur des C'mins!
Je vos dis mé que Jêrri s'en va ès tchans!
Et Maît'e Dan ersorti comme il 'tait entré, ch'estàdithe, comme un enragi.
Caouain
23/4/1921
Viyiz étout: