|
Jé n'sé pas oquo trop Tchèst qu'en est la raison; Mais i faut bein qu'chutte fais Qu'j'ayons une êlection. Ch'nest pas qu'y'ait rein à dithe Sus nos deux vier Chantgniers, Mais pour pliaithe à tout l'monde... Faudrait don être chorchiers! Mais les Saint Louothenchais Qu'ont un mio d'sentiment, Né manqu'thont pas d'criyer Vive Helleur et Norman. Ch'n'est pas qu'ils aient mantchi A remp'yi lus fonctions; Mais bah! j'savons bein tous Tchest qu'chest qué d'sêlections! Quand même qu'un candidat S'sait chein qu'y'a d'pus parfait, Y'en a tréjous tchitchun Qui n'est pas satisfait. Mais j'espéthons tout d'même Qui n'yétha pas d'changement; Jé sommes bein comme jé sommes, Vive Helleur et Norman. Pis qu'j'avons d'bouans Chantgniers Qui sé r'mettent en avant Pour servir lus pâraisse Un aut' bail dé trais ans, Pourtchi don s'en dêfaithe? Ils ont fait ch'qu'ils ont peu, Tu t'trompthas Saint Louothains S'tu cré d'trouver miyeu. Et s'ou voulez m'n'avis J'vos l'don'nai tout bouannement Votez, Saint Louothenchais Pour Helleur et Norman. Et not'e pâraisse chutte fais Pathaît être animée; Déjà les candidats Ont 'tait faithe lus touonnée Par la pierre des Baissièthes Et par les Saint Germains, Par lé mont dut hutchet Et siez les Vallésiens. Et bein Saint Louothenchais, J'vos l'dit bein sérieusement, Faut voter Vendredi Pour Helleur et Norman. Quand deux hommes ont servi Lus pâraisse de lus mus Ch'n'est pas sans bouannes raisons Qu'i' faut lus montrer l'us. - Saint Louothains r'souvein-té Qué tu'as 'té bein servie Ches trais dernièthes années. Tchi honte si tu l'oublie! Et bein Saint Louothenchais Comme sign' de r'merciment Votez tous Vendredi Pour Helleur et Norman. Saint Louothains, prend m'n'avis Montre ta gratitude Garde d'bouans serviteurs - Comme ch'est ten habitude. - Pis qu'tuas deux bouans chantgniers Qu'ont fait d'lus mus pour té: Aussi longtemps qu'tu peux Tâche dé les conserver Et Vendrédi tchiveint Prouve nous ten attachement A tes deux viers Chantgniers: Vive Helleur et Norman! Quand ils ont 'té appelés Onti jamais r'fusé D'aller pour faithe lus d'vé A miéjeu ou min'nièt? Pourtchi changi ch'quest bein? Pourtchi tout boul'verser? Pourtchi faithe un affront A d's'hommes qu'ont fait lus d'vé. Votez Saint-Louothenchais Pour yeux par Compliment. R'pensezy Vendredi, Vive Helleur et Norman! Janvyi 1902 |
Viyiz étout: