Les Pages Jèrriaises

Lé Scrutin


Nou zen ouet-y pâlé, l's'ouoreilles en cônent
Pétits et grands, sots et malins, tous en prônent!
Les uns avec jouaie, d'aoutres avec chagrin,
Ils ont tous d'tchi dire à cause du scrutin.
Les uns disent, mais avec les lermes es yiers,
Que chest assais pour faire ervenin les viers!
Et que le temps passai; (Ah chu buoun vier temps)
Y n'fallait pon pensé à ditais changements!
A la v'nin pas de dêjeunnniers, pas de fricots,
Pas unne fais à bère, mais nos gens sont fos!
Allais don voté ov rein dans la bédaine,
(Sans deux d'goûts d'litcheu pour vos cauffé la coinne,
Ou z'êtes bein seux de faire tchicq' frédaine.)
Puoure gorge secque! puour estouma faillyi!
Ou voterais p't'être contre votre parti!
Quand nou zest bein guédai,
(Es frais du Candidat)
Et pis bein abreuvai,
Ma fé chest q'nou sen va
Au "Poll" coumme "des braves," sa vouaie dounné,
Et sounnant tout haut dans sa paute,
(Criyions tchi yia hardi de faute)
Les deusse trais p'tits jaunes q'nou veint d'erchévé!!
Je ne vos pâllait pon "d'oeux," de "viaux" ni dé "cats,"
Car sapresti, Mousieu, nou n'en finirait pas;
Quoicque dé hieun, j'en entends quicques uns crié,
"Et le djiantre; jusqué yiou que j'allons d'valé!
"Pus de neuves corniches, pas de neus pignons!
"Quand je voudrons erparé un mio nos maisons,
"Faudra 'sé même' payi tcherpentchairs et machons!"
Vot' scrutin! chen sera t'y pour nous unne belle fête,
Qué d'coulé "du papi dans unne mannière de bouaîte!!"
Enfin, je laisse tous sé hallé d'affaire,
Coumme y voudront châtchun à sa mannière;
Mais j'men vais, si vos pliait, vos conté unne histoire:-
En Angliéterre, auprès unne êlection,
Dans unne p'tite pliaiche (j'en ai perdu l'nom),
Que la sçaine se passi,
Un candidat n'avait gagni
Que par unne seule voiée,
Et personne ne savait;
Comment qué, un certain vier corps du village,
(Un drôle de ouaîsé) avait fait usage
Dé san droit, (y votent tuous là par le ballot),
Les vaisins l'y d'mandaient, mais n'en êrachaient mot,
Quand un Dimanche en r'venant d'l'Eglize
(Car not' vi 'tai dévôt, faut que je le dise),
Le docteu l'happi dans unne petite ruette,
Et en p'tit d'temps, vos li graissi sa garguette;
En l'y pâlant d'ses maux, dé san roumatisse,
Y yiavait dounnai d'longuent, y l'y dit par malice;-
"Tom, y n'yia ichein qué nos deux, persounne ne nos ouet,"
Et dit mé ach'teu pour tchest que tu as voté
"Dans l'êlection tchi s'est dernièrement passaie?"
- Dans le chervé du vier Tom, y veint unne idaie,
Tchi ferait mus de dire tout à san docteu,
Coumme s'il avait 'tai malade, et d'bouan tcheu,
Y n'en fit pon d'mystère, et y l'y compti
Coummest qui s'yérait priens, sans changi de parti.
Y dit: "Siez nous veint en prémié lieu,
"Un grand et bein charmant Mousieu,
"Tchi tout buoun'ment me demandi
"Pour ma vouaie dans la préchaine êlection,
"Et j'l'y promins sans auqune hésitation!...
"Auprès un autre veint, il 'tait bein affable,
"De buounne humeur, car y s'mins à not' table,
"Tout à s'naise, coumme s'il avai 'tai siez-li!
"Pis, sans compliements, m'démandid' voté pour li;
"Coumment l'erfuzé? je l'y dit aitou qué oui!"
- Le docteu en rit bein: "Tu étais là bein happai,
Coumment l'd'jiantre est que tu en as èscappai?
Si j'promettais à deux je serais bein badrai!"
Mais notre malin vi,
Sans s'descont'nanchi,
Dit à san docteu: "Né v'chein coumme je m'y priens,
Quand le jour de l'eslection veint,
Je fili au poll en buoun temps
(J'avais bein arrangi man plian),
Je happi papi et pliumme,
Et mes yiers bein clios je frumme,
Pique une merque à d'ji l'a ders,
De yieun des noms, petêtre en travers
Dans la bouaîte, j'coule bein vite man papi,
Et le djiantre seul sait pour tchest que je voti...

Mousieu, pour les cheins qu'ont la conscience tendre,
V'la un p'tit conte, s'y veulent le comprendre,
Tchi puourra peut-être bein les réconcillyi,
A voté, sans regrait,
Pour le Scrutin Sécrait,
Et pliaire es deux candidats, sans lus menti!...

Jean des Ruettes

P.S. -

De même les siens qu'ont peux, sans être des poltrons!
Puourront voté, justement coumme y voudront;
Un houmme qui travaille pour un buon maître,
Qui l'paie bein, est bein obligi de paraître
D'ov li, et s'il a fanmille, y n'est pas sans
Pensé bein souvent, d'vant voté, à ses esfants;
Qu'est qui s'oppose au Scrutin? des candidats,
Qui ont grand peux qu'à l'avenin, y n'puouraient pas
Acaté des voies; pis yia aitou des voteurs,
Qu'ont peux de n'pouvé pus vendre la leur;
Car ne v'la les seuls qui font des haut-cris,
Que nos privilièges vont nos être ravis!!

J.D.R.
 
Nouvelle Chronique de Jersey 12/1/1890

 

Viyiz étout:

 

Les Pages Jèrriaises