Trenton, Michigan,
U.S.A.
Lé 8 dé novembre, 1975.
Moussieu l'Rédacteu,
Ch'est eune bouanne chose pour mé qué jé n'sis pon un vieau, car un vièr diton nouos dit qué Changement d'pâtuthe fait les vieaux gras!, et j'ai ieu tout pliein d'changement d'pâtuthe à ches drein. Y'a mains d'trais s'maines j'tais acouo en Jèrri, et j'ai dêjà d'meuthé dans deux pays d'pis et viagi eune affaithe dé sept ou huit mille milles. La s'maine pâssée j'vouos êcrivais du Cannada, et m'èrvélà ès Êtats-Unis d'Améthique. J'ai-t-i' engraîssi? Malheutheusement, j'pense qué oui - mais dans man cas ch'n'est pon à cause du changement d'pâtuthé - ch'est par aver mangi trop dans châque!
En pâlant d'vieaux, v'la tchi m'fait penser ès êlections en Jèrri chu mais. Ch'est probabl'ye tch'i' n'y'a pon d'vieaux tchi votent à ch't heu, mais y'en avait l'temps pâssé et chose assez r'mèrquabl'ye, lé rêsultat d'eune êlection dépendait tchiquefais sus la vouaix d'iun ou deux d'ieux. L'embête était tréjous qué l'candidat d'un parti 'tait assujetti à l'appréhension qué s'n advêrsaithe en gângn'nait en payant pus qu'li au vieau, car lé vieau n'était pon partisan d'un côté ni d'l'autre. Il 'tait partisan d'la pus haute rêcompense pour sa vouaix et r'chévait souvent telle rêcompense des deux partis, et comme lé vote 'tait au scrûtîn ché n'tait pon aîsi d'saver pour létché des deux candidats tch'il allait voter.
Ch't' încertitude-là donnait d'la gêne ès candidats, mais y'avait des rusés tchi trouvaient tchique mouoyen d's'asseûther tch'i' vot'tait du côté d'lus parti - comme dans l'cas des Louothièrs tchi mîndrent des bandages lé tou d'la gambe dé lus vieau comme s'oulle 'tait rompue, et l'condisîdrent en cârrosse à la Salle Pârouaissiale. Dans tel cas, lé Juge autorisé v'nait à la cârrosse enregistrer la vouaix, et l'malade 'tait supposé d'lî dithe à l'ouothelle pour létché tch'i' votait. Dans chu cas, lé vieau avait 'té înstruit dé l'dithe à haute vouaix - chein tch'i' fit - et quand l'Juge lî dit tch'il éthait deu l'dithe en bas, i' s'estchûsit en disant tch'i' n'lé savait pon. Mais il 'tait trop tard. Sa vouaix 'tait enregistrée, et san parti 'tait seux tch'il avait voté du bouan bord.
Il a pâssé hardi dg'ieau l'tou d'La Corbiéthe dépis chu temps-là, et ch'est probabl'ye tchi n's'en va pon y'aver d'vieaux à voter dans l's êlections d'nouos jours en Jèrri. Mais i' s'en va y'aver des contents et des malcontents quand les rêsultats s'en vont êt' annoncés. Ch'est tréjous d'mème, car i' y'a des gangnants et des pèrdants, et ch'n'est pon tréjous les miyeurs tchi gângnent. Et i' n'faut janmais oublier qué l'chein tchi sèrt lé publyi sèrt un îngrat.
Ou-s-avez la chance en Jèrri où'est qu' les candidats c'menchent à tcheûter des vouaix eune affaithe dé tchiques sémaines dévant eune êlection. Ichîn en Améthique v'la tchi duthe si longtemps qu' tout l'monde en a pliein ses braies. Par exampl'ye, la préchaine êlection pour Président né s'sa pon d'vant la fîn d'l'année tchi veint, mais nou c'menche dêjà à en vaie mention dans les gâzettes et la télévision, et j'allons beintôt en êt' embêtés niet et jour. Ch'est absolument riditchule, car lé Président a à néglyigi san travas pour travailli entouor sa préchaine êlection s'i' veurt continnuer. Autrément, les gens créthaient tch'i' n'est pon întérêssi assez pour s'en d'menter, et ché s'sait un avantage pour sén advèrsaithe.
En Jèrri, ou-s-avez sans doute la chance dé trouver des pèrsonnes capabl'yes tchi sont prêtes à sèrvi pour rein dans la police des pâraisses et siégi dans L's Êtats. Un précieux privilège tch'i' faut consèrver à toute forche. I' faut don combattre sans cêsse contre les parvenus tchi veulent êt' êlus dans L's Êtats pour êventuellement lus faithe payi. Ches'-là s'lanchent comme candidats et gângnent des vouaix en promettant un tas d'bénéfices tchi né f'thaient qué d'haûchi les taxes et l's împots pour y suffithe s'il' 'taient êlus. Séyiz sus vouos gardes et continnuez à êlithe des Jèrriais tchi sont îndépendants point d'veue d'finnances. S'il ont seu comment prêsèrver la prospéthité pour ieux-mèmes i' séthont comment la prêsèrver pour lé publyi étout.
Ichîn, en Améthique et au Cannada, les membres des parléments continnuent à voter entre ieux pour hauchi lus salaithes, et l'pouorre publyi n'a rein à y dithe. Et pis v'la tchi donne un pid d'extra ès sŷndicats des travailleurs dé vouler aller en grève pour forchi la hauche dé lus gages étout. Ches politiciens-là dans l'Parlément, payis à rein n'faithe, haûchissent lus gages de chînquante pour chent, les chefs dé sŷndicats disent, et l'monde nouos bliâment pour nouos mett' en grève pour gângni deux-s'trais sou d'pus par heuthe!
Né v'là l'cri dans ches pays 'chîn du Nouvieau Monde. Sans doute i' sont trop grands pour pouver s'gouvèrner souos les mèmes conditions qu' en Jèrri. Mais n'oubliez pon bouans Jèrriais d'race tchi restent en Jèrri, qu' ou-s-avez héthité un mangnifique système dé sèrvice honorifique pour vouos gouvèrner, et combattez à toute forche pour lé prêsérver.
George d'La Forge
Viyiz étout: